Strasbýrgte atys uıymdastyrǵan kúdiktiniń tulǵasy anyqtaldy
STRASBÝRG. QazAqparat -Strasbýrg qalasynda atys uıymdastyrdy degen kúdiktiniń tulǵasy anyqtaldy. Bul týraly Frantsııanyń Іshki ister mınıstrliginen málim etti, habarlaıdy «QazAqparat» HAA-nyń menshikti tilshisi.
Frantsııa ІІM-niń aqparatynsha, er adam 29 jasta. Onyń esimi tergeý múddesine oraı jarııalanbaıdy. Seısenbi kúni bolǵan atys saldarynan kúdikti jaraqat alǵan. Biraq ol oqıǵa ornynan boı tasalap úlgergen.
Polıtsııa qylmyskerdiń el aýmaǵynan shyǵyp, kórshiles Germanııada júrgenin joqqa shyǵarmaıdy. Atap ótilgendeı, er adam «qoǵamǵa qaýip tóndiretin tulǵa» retinde esepte turǵan. Biraq buryn-sońdy lańkestik qylmystarǵa qatysy bolmaǵany atap ótiledi.
Frantsııa prokýratýrasy lańkestik baby boıynsha is qozǵady.
El bıligi shekaradaǵy baqylaýdy kúsheıtti, joldarǵa polıtsııa jasaqtary qoıylǵan. Jınalystar men mıtıngterdi uıymdastyrýǵa tyıym salyndy.
Eske salsaq, seısenbi kúni keshkilik Strasbýrg qalasynyń ortalyǵynda, rojdestvolyq jármeńkege jaqyn mańda adamdarǵa atys qarýynan shabýyl jasaldy. Sońǵy málimetter boıynsha, 2 adam qaza taýyp, 11 adam jaraqattandy.
Frantsııa polıtsııasynyń aldyn ala málimetine sáıkes, atystan qaza tapqandar men jaraqat alǵandardyń arasynda Qazaqstan azamattary joq.
Avtory Tımýr Dúısekeev
Foto: tagesspiegel.de
