Strasbýrg soty týǵan qaryndasymen oınas bolǵan nemistiń shaǵymyn joqqa shyǵardy
ASTANA. 13 sáýir. QazAqparat - Strasbýrgtegi adam quqyǵy jónindegi Eýropa soty 35 jasar Patrık Shtıýbıngtiń Germanııada ıntsestke (týǵanymen oınas bolý) qarsy zańyna qatysty shaǵymyn qaraýdan bas tartty, dep jazady Spiegel.
Bul nemis aralarynda 4 bala bar óziniń týǵan qaryndasy Sıýzan Karolevskımen tósektes bolǵany úshin 3 jyldan astam túrmede otyryp shyqqan bolatyn. Strasbýrg sýdıalary ıntsestke tyıym salý adamnyń jeke quqyǵyn taptamaıdy dep sheshken.
Germanııada aǵaıyndylardyń jynystyq qatynasqa túsýi qylmystyq is retinde qarastyrylady. Patrık Shtıýbıng osyndaı qylmysy úshin 3 jyldan astam ýaqyt túrme dámin tatyp shyqty. Nemis sottary da Adam quqyqtary jónindegi Eýropa soty sııaqty ıntseske qoıylǵan tyıymdy qos qoldap qoldaıdy. GFR-diń federaldyq soty ózinen tómengi sottardyń (Strasbýrg soty) bul sheshimin 2008 jyly-aq qoldaıtyndyǵyn bildirgen bolatyn. Sýdıalardyń pikirinshe, mundaı tyıym adamnyń jeke quqyǵyn taptamaıdy, kerisinshe, otbasylyq qundylyqtar men ult saýlyǵyn qorǵaıdy.
Shtıýbıng pen onyń advokaty Endrık Vılgelm Germanııadaǵy ıntsestke tyıymdy múldem joıǵyzbaqqa kúsh salýda. Olardyń aıtýynsha, bul eskiliktiń qaldyǵy, al ult saýlyǵy degen bos sandyraq kórinedi. Eger de mundaıǵa tyıym salynsa, onda «40 jastan asqan áıelder men múgedekterge» de balaly bolýǵa tyıym salý kerek edi deıdi olar.
Patrık pen Sıýzan ártúrli otbasylarda tárbıelengen. Patrık 3 jasynda balalar úıine berilip, 7 jasynda basqa otbasy asyrap alǵan. Al 24 jasynda ol óziniń ata-anasyn taýyp alyp, sol kezde 16 jastaǵy qaryndasymen tanysady. Analary ólgennen keıin olar birge tura bastaıdy. 2001-2005 jyldar aralyǵynda 4 balany dúnıege ákeledi, olardyń ekeýi múgedek bolyp týylǵan.
Patrık Shtıýbıngtiń Strasbýrg sotyna ókpesi qara qazandaı. Onyń oıynsha, nemistiń sot júıesi onyń «keremet» otbasyn qıratyp, quqyǵyn taptap otyr. Qazir Sıýzan ekeýi bólek turady. 3 balasy túrli otbasylarda tárbıelenýde, al kishi balasy anasymen birge.
