Strasbýrg - Eýropa Rojdestvosynyń astanasy
ASTANA. QazAqparat - Kári qurlyq Rojdestovo merekesiniń daıyndyǵyna bilek sybana kiristi, dep jazady «Habar 24».
Aldyńǵy jyldarmen salystyrǵanda bıyl qaýipsizdik sharalary aıtarlyqtaı kúsheıtilgen. Ásirese, merekelik jármeńkeler men ortalyq alańdar qatań baqylaýǵa alynǵan.
Strasbýrg Eýropa Rojdestvosynyń astanasy sanalady. Óıtkeni, mundaǵy merekelik jármeńkeniń 5 ǵasyrǵa jýyq tarıhy bar. Al, meıram qarsańynda qalaǵa arnaıy keletin saıahatshylar sany 2 mıllıonnan asady. Olar ǵajaıyp ertegiler álemine enip, ózin sol jerdiń keıipkeri sezingisi keledi.
«Qala óte ádemi! Biz munda Sıdneıden keldik. Qala biz oılaǵannan da tamasha bolyp shyqty. Ǵajaıyptar álemine buryn senbeýshi edim. Qazir kózqarasym ózgerdi. Tek ózim ǵana emes, otbasymmen birge keldik», - deıdi avstralııalyq saıahatshy Djordı Fıkarellı.
Berlındegi qaıǵyly oqıǵadan keıin shaharda qaýipsizdik sharalary aıtarlyqtaı kúsheıtilgen. Ásirese, halyq kóp jınalatyn merekelik jármeńkeler qatań baqylaýda.
«Bunyń aldynda Nıýrnbergte bolǵanbyz. Al, Strasbýrg odan da ádemi eken. Bári kóńilimizden shyǵyp jatyr. Ásirese, jergilikti turǵyndar men jan-jaqtan jınalǵan qonaqtar bir-birine qurmet kórsetip, mereke aldynda keremet kóńil-kúı syılaıdy», - deıdi ýkraınalyq saıahatshy Veronıka Maşenko.
Kúsheıtilgen tártip buqaranyń záresin ala qoıǵan joq. Kerisinshe, merekelik kóńil-kúı ornap, halyq bir-birine syılyq alyp máre-sáre.
