«Strandja» týrnırine qaı elderden boksshylar qatysady

ASTANA. KAZINFORM – Bolgarııa astanasy Sofııa qalasynda 23 aqpan-2 naýryz aralyǵynda ótetin «Strandja» halyqaralyq týrnırine qaı elderden boksshylar qatysatyny belgili boldy.

Dúbirli dodada elimizdiń atynan ulttyq qurama sapynda 39 otandasymyz sharshy alańǵa shyǵady.

Týrnırge 36 elden 300-den astam boksshy keletini naqtylandy. Olardyń arasynda Bolgarııadan bólek Qazaqstan, Ózbekstan, AQSh, Kýba, Ázerbaıjan, Brazılııa, Ýkraına, Mońǵolııa, Anglııa, Túrkimenstan, Qytaı Taıpeıi jáne ózge memleketter bar.

Erler quramasynyń bas bapkeri Nurjan Nasanov budan buryn Ispanııadaǵy «Boxam Elite-2026» jáne Bolgarııadaǵy «Strandja» týrnıri men aldaǵy eki oqý-jattyǵý jıynynyń qorytyndysy boıynsha Mońǵolııada ótetin Azııa chempıonatynyń (28 naýryz-11 cáýir) tizimin jasaqtaıtynyn atap ótti.

Qazirge deıin otandastarymyz týrnırden 23 altyn, 34 kúmis, 45 qola júlde enshiledi. Onda Qazaqstan quramasy alǵash ret 1994 jyly baq synady. Onda 75 kelide Valerıı Kýzmentsov kúmis júlde alǵan edi. 2005 jyly Serik Sápıev (60 keli) elimizdiń atynan alǵashqy chempıon retinde tirkeldi. Al áıelder arasynda Valentına Halzova 2 márte jeńimpaz tuǵyryna kóterilse, erler arasynda Ertýǵan Zeınýllınovtiń qatarynan ekinshi márte chempıon atanýǵa múmkindigi bar.

Ótken jyly Qazaqstan quramasy óz tarıhyndaǵy eń úzdik kórsetkishin tirkedi. Olar 6 altyn medalmen jalpy esepte birinshi oryn aldy.

Eske salsaq, budan buryn «Strandja» halyqaralyq týrnırine baratyn qazaqstandyq boksshylar anyqtaldy.