Strandja týrnırinde qazaqstandyq eki boksshy jekpe-jekke shyqpaıdy

ASTANA. KAZINFORM - Bolgarııa astanasy Sofııa qalasynda bolyp jatqan Strandja halyqaralyq týrnıriniń úshinshi jarys kúni, 25 aqpanda qazaqstandyq boksshylardyń eki jekpe-jegi ótkizilmeıdi.

Bul jóninde Qazaqstan boks federatsııasy málim etti.

El quramasynan Arýjan Jańabaeva (65 keli) jaraqatyna baılanysty Navbahor Hamıdovamen (Ózbekstan) sharshy alańǵa shyqpaıdy.

Sondaı-aq Danıal Saparbaı (90 keliden joǵary) jekpe-jekten bas tartýyna baılanysty Nurlan Saparbaı avtomatty túrde shırek fınalǵa shyqty.

Endi el quramasynan keshki sessııada Laýra Esenkeldi AQSh ókili Merı-Endjelıs Rosendomen kezdesedi.

Qazaqstandyq bylǵary qolǵap sheberleri arasynan kúndizgi sessııada áıelder arasynda 57 kelide Uljan Sársenbek taǵy bir otandasymyz Aıdana Zabynbekovany, Azııa chempıony Rımma Volosenko (60 keli) AQSh ókili Alısha Kroketti 5:0, 60 kelide Vıktorııa Grafeeva túrkııalyq Gızem Ozerdi 4:1 esebimen jeńdi.

Al Jazıra Oraqbaeva 1/8 fınalda 2025 jylǵy álem chempıonatynyń qola júldegeri Ferýza Kazakovaǵa 0:5 esebimen ese jiberip, jarys jolynan shyǵyp qaldy.

23 aqpan-2 naýryz aralyǵynda ótetin týrnırge 36 elden 300-den astam boksshy keletini naqtylandy. Olardyń arasynda Bolgarııadan bólek Qazaqstan, Ózbekstan, AQSh, Kýba, Ázerbaıjan, Brazılııa, Ýkraına, Mońǵolııa, Anglııa, Túrikmenstan, Qytaı Taıpeı jáne ózge memleketter bar.

Aıta ketsek, Qazaqstan Bolgarııa astanasyna 39 boksshyny attandyrdy. Bıyl Strandja kýbogy 77-márte ótkizip jatyr. Bul týrnır Eýropa qurlyǵyndaǵy tarıhy tereń sporttyq jarys sanalady.