Strandja týrnıri: Búgin qazaqstandyq tórt boksshy sharshy alańǵa shyǵady

ASTANA. QazAqparat - Bolgarııa astanasy Sofııa qalasynda ótip jatqan bokstan halyqaralyq «Strandja-2023» týrnırinde 22 aqpanda qazaqstandyq tórt sportshy sharshy alańǵa shyǵady, dep habarlaıdy QazAqparat tilshisi.

Elorda ýaqytymen 17:00-de bastalatyn kúndizgi sessııada Erasyl Tańqaı (60 keli), Ertýǵan Zeınýllınov (63,5 keli), Nurqanat Raıys (75 keli) jáne Qamshybek Qońqabaev (92 keliden joǵary) synǵa túsedi.

Aıta ketsek, buǵan deıin Erasyl Tańqaı pen Ertýǵan Zeınýllınov alǵashqy jekpe-jegin sátti ótkizip, jarysty jalǵastyrýǵa múmkindik aldy.

Al Nurqanat Raıys pen Qamshybek Qońqabaev alǵashqy kezdesýin ótkizedi.

Endi Erasyl Tańqaı fılıppındik Pol Djýlaıfer Baskon, Ertýǵan Zeınýllınov ózbekstandyq Mýjıbıllo Týrsýnovpen kezdesedi.

Sondaı-aq, Nurqanat Raıys avstralııalyq Domınık Molınaro, Qamshybek Qońqabaev nıderlandtyq Sten Bertenspen sheberlik baıqasady.

Foto:olympic.kz