Strandja kýbogy-2024: Alty boksshymyz shırek fınalǵa ótti

ASTANA. KAZINFORM – Kishi álem chempıonaty sanalatyn Bolgarııa astanasy Sofııada ótip jatqan Strandja kýbogynda alty boksshymyz shırek fınalǵa shyqty.

Atap aıtsaq, Sanjar Táshkenbaı 51 kelige deıingi salmaqta qyrǵyzstandyq Bekzat Ergeshevti 5:0 esebimen jeńdi. Onyń endigi qarsylasy – mońǵolııalyq Gan-Erdene Ganhý bolmaq. 

57 keli salmaqta Orazbek Asylqulov alǵashqy kezdesýinde ýkraınalyq Vladıslav Stasıadan basym tússe, 63,5 kelide el namysyn qorǵaǵan Erasyl Tańqaı rýmynııalyq boksshy Krasımırý Djýrovty jarys jolynan taıdyrdy. 

75 kelige deıingi salmaqta Nurqanat Raıys qyrǵyz boksshysy - Danıel Abdýrahmanovty 5:0 esebimen utty. Endi ol 9 aqpanda ózbek Fazlıddın Erkınboevpen judyryqtasady.

Kásipqoı boksta da baq synap júrgen Tursynbaı Qulahmet ózbek boksshysy Alohon Abdýllaevtan 4:0 esebimen basym tústi. Shırek fınalda ol ýkraınalyq Matvıı Rajbamen sharshy alańǵa shyǵady.

80 keli salmaqta Tursynbaı Qulahmet ózbek boksshysy Alohon Abdýllaevtan 4:0 esebimen aılasyn asyrdy. Shırek fınalda ol ýkraınalyq Matvıı Rajbamen kim myqtyny anyqtaıdy. Aıta ketsek, Tursynbaı Qulahmet - kásipqoı boksta da baq synap júrgen boksshylarymyzdyń biri.

Al 86 keli salmaqta synǵa túsip jatqan Abzal Quttybekov qytaılyq Han Sıýdjendi 4:1 esebimen jeńdi. Ókinishke qaraı, 71 kelige deıingi salmaqta Talǵat Sháıken shırek fınalǵa shyǵa almady. Ol grýzın boksshysy Eskerhan Madıevpen bolǵan jekpe-jekte 3:2 esebimen qarsylasyna jol berdi. 

Esterińizge sala ketsek, osyǵan deıin atalǵan týrnırde qytaıda turatyn qazaq boksshysy Toqtarbek Tańatqan da shırek fınalǵa shyqqanyn jazǵan bolatynbyz.

Bıylǵy básekede 28 elden 178 boksshy 13 salmaqta júldeni sarapqa salady. Atalǵan týrnır 12 aqpanda máresine jetedi.

Aıta keteıik, 2023 jyly ótken jarysta Orazbek Asylqulov (57 keli) – kúmis jáne Nurqanat Raıys (75 keli) – qola júldeger atanǵan bolatyn.