Strandja kýbogi – 2025: Alǵashqy jarys kúni bir boksshymyz jarys jolynan shyǵyp qaldy

ASTANA. KAZINFORM — Bolgarııa astanasy Sofııada ótip jatqan dástúrli Strandja halyqaralyq týrnıriniń alǵashqy kúni  tórt qazaqstandyq sharshy alańǵa shyǵyp, bireýi jarys jolynan shyǵyp qaldy.

Naqtyraq aıtsaq, qazaqstandyq boksshy Dáýlet Moldashev Bolgarııa astanasy Sofııada ótip jatqan Strandja kýbogindegi alǵashqy aıqasynda-aq jeńilip qaldy.

57 kelide óner kórsetetin otandasymyz 1/8 fınalynda ázerbaıjandyq Zalımhan Sýleımanovpen judyryqtasty. Birinshi raýndta ázerbaıjandyq boksshy 4:1 esebimen basym tústi. Ekinshi raýndta qazaq boksshy esesin qaıtarǵandaı boldy. Degenmen úsh raýnd qorytyndysy boıynsha Sýleımanov tóreshilerdiń sheshimimen jeńiske jetti.

Al 67 keli salmaqta el namysyn qorǵaǵan Sanatáli Tóltaev birinshi aıqasynda qarsylasyn aıqyn basymdyqpen utyp, týrnıriniń kelesi aınalymyna ótti. Ol alǵashqy jekpe-jeginde Bolgarııa boksshysyn 5:0 esebimen jeńdi.

Sonymen qatar keshe alǵashqy jarys kúni qazaqstandyq Tórehan Sabyrhan men Serik Temirjanov jekpe-jeksiz kelesi aınalymǵa joldama alady. Qos boksshymyzdyń qarsylastary da Ózbekstannyń Olımpıada chempıondary bolatyn. Ekeýi de sharshy alańǵa shyqpaı qaldy.

Ózbekstan Boks federatsııasynyń Instagram paraqshasyndaǵy resmı aqparat boıynsha, Abdýmalık Halokov (60 keli) kásibı rıngtegi jekpe-jeginiń ýaqyty ózgerýi sebepti jattyǵý jıynynan ótý úshin Ispanııaǵa attanyp ketken. Al Asadhodja Mýıdınhodjaev (67 keli) týrnırge daıyndyq barysynda alǵan jaraqatynan tolyq saýyǵa almaýyna baılanysty Tórehanmen jekpe-jekten bas tartqan.

Osylaısha, Tórehan Sabyrhan men Serik Temirjanov jekpe-jeksiz kelesi aınalymǵa ótti.

Esterińizge sala keteıik, osyǵan deıin Ózbekstannyń qos Olımpıada chempıondary qazaq boksshylaryna qarsy sharshy alańǵa shyqpaıtyny týraly jazǵan bolatynbyz.