Strandja-2025: Úsh burymdy boksshymyz jekpe-jekterin jeńispen aıaqtady

ASTANA. KAZINFORM — Bolgarııa astanasy Sofııa qalasynda ótip jatqan dástúrli halyqaralyq Strandja týrnıriniń úshinshi jarys kúni sharshy alańǵa shyqqan burymdy boksshylarymyz arasynda jekpe-jekter jalǵasyp jatyr.

Kúndizgi sessııada sharshy alańǵa shyqqan segiz boksshymyzdyń úsheýi jarysty sátti aıaqtap, kelesi aınalymǵa ótse, beseýi qarsylastaryna jol berdi.

Naqtyraq aıtsaq, 48 keli salmaqta synǵa túsken Aqbota Bolat túrkııalyq qarsylasy Rabıa Topýzǵa 1:4 esebimen jol berse, 50 keli salmaqta el namysyn qorǵaǵan Elıanur Turǵanova taǵy bir túrkııalyq qarsylasy Barýt Erıvandy 5:0 esebimen jarys jolynan taıdyrdy.

57 kelide synǵa túsken taǵy bir otandasymyz Uljan Sársenbekte túrkııalyq qarsylasy Benek Pınardan 0:5 esebimen oısyraı utyldy. 60 kelide Anar Tursynbek Kosta-Rıka boksshysy Doneta Sadıký🇽🇰qa 0:5 esebimen jeńildi. Sonymen qatar 50 kelide synǵa túsken Gúlnár Turapbaıda Kosta-Rıka eliniń burymdy boksshysy Zlatıslava Chýkanovaǵa 0:5 esebimen jol berdi. Al 66 kelide synǵa túsip júrgen otandasymyz Uldana Taýbaı Túrkııa boksshysy Berfın Kabakqa 0:5 esebimen jeńilip qaldy.

Sonymen qatar 57 keli salmaqta judyryqtasyp júrgen otandasymyz Aıdana Jabynbekova Anglııa boksshysy Samın Toýsaıntti 3:2 esebimen utyp kelesi kezeńge ótti. Al 60 keli salmaqta Rımma Volosenko grekııalyq qarsylasy Sofııa Legakıdi 5:0 esebimen jeńdi.

Endi keshki sessııada taǵy 7 boksshy qyzymyz judyryqtasýǵa sharshy alańǵa shyǵady.
Esterińizge sala keteıik, osyǵan deıin Bekzat Nurdáýletov pen Nurbek Oralbaı jartylaı fınalǵa shyqqany týraly jazǵan bolatynbyz.