Strandja-2025: Taǵy úsh boksshymyz jartylaı fınalǵa shyqty

ASTANA. KAZINFORM – Bolgarııa astanasynda ótip jatqan bokstan halyqaralyq «Strandja kýboginiń» tórtinshi jarys kúninde taǵy úsh boksshymyz jartylaı fınalǵa shyqty. Osylaısha erler quramasynan jartylaı fınalǵa shyqqan boksshylar sany 14-ke jetti.

Keshki sessııada judyryqtasyp jatqan boksshylar arasynda 57 kelige deıingi salmaqta Orazbek Asylqulov ta jartylaı fınalǵa shyqqandar qataryna qosyldy. Ol shırek fınalda Ýels eliniń boksshysy Oýen Harrıs-Allennen aılasyn asyrdy. Orazbek tóreshiler sheshimi boıynsha qarsylasyn 4:1 esebimen utty.

71 kelige deıingi salmaqta Abylaıhan Júsipov ta qarsylasyna des bergen joq. Qazaqstandyq boksshy Belarýstan kelgen Oleksıı Shırıaevty jarys jolynan shyǵardy. Endi, Abylaıhan 1 naýryz kúni ıtalııalyq Gýıdı Rontanımen judyryqtasady.

Al 75 kelige deıingi salmaqta otandasymyz Farýh Toqtasynovtyń da mereıi tasyp, jartylaı fınalǵa shyqty. Ol shırek fınalda ázerbaıjandyq Sarhan Alıevti aıqyn basymdyqpen utty. Esep – 5:0. Bul onyń osy jarystaǵy ekinshi jekpe-jegi. Buǵan deıin aǵylshyn Hıýıtt Patrıkti jeńip shyqqan bolatyn.

Qazirge deıin Bekzat Nurdáýletov, aǵaıyndy Nurbek Oralbaı men Aıbek Oralbaılar, Temirtas Júsipov, Danıal Sábıt, Muhammedsabyr Bazarbaıuly, Ertýǵan Zeınýllınov, Tımýr Nurseıitov, Erasyl Jaqpekov, Tımýr Qabdesh jáne Tórehan Sabyrhannyń jartylaı fınalǵa shyqqanyn jazdyq.