Strandja-2025: Taǵy eki boksshymyz jartylaı fınalǵa shyqty
ASTANA. KAZINFORM – Bolgarııa astanasynda ótip jatqan bokstan halyqaralyq «Strandja kýbogynyń» tórtinshi jarys kúninde sharshy alańǵa shyqqan taǵy eki boksshymyz jartylaı fınalǵa shyqty.
Onyń biri - Temirtas Júsipov bolsa, ekinshisi - Danıal Sábıt.
48 kelige deıingi salmaqta el namysyn qorǵap jatqan otandasymyz Temirtas Júsipov shırek fınalda ázerbaıjandyq Sýbhan Mamedovti 4:1 esebimen jeńip, jartylaı fınalǵa joldama alsa, 51 keli salmaqta synǵa túsken otandasymyz Danıal Sábıt shırek fınalda Grýzııa boksshysy Davıt Djaparıdzeni 5:0 esebimen utyp, qarsylasyn jarys jolynan taıdyrdy. Úshinshi raýndta bir ret nokdaýnǵa da túsirdi.
Temirtas Júsipov pen Danıal Sábıt ekeýin qosa aıtqanda qazirge deıin bes boksshymyz atalǵan týrnırdiń jartylaı fınalyna shyǵyp otyr.
Osyǵan deıin úsh boksshymyz jartylaı fınalǵa ótkenin jazǵan bolatynbyz. Olar - Bekzat Nurdáýletov jáne aǵaıyndy Nurbek Oralbaı men Aıbek Oralbaılar.