Strandja-2025: Taǵy bes burymdy boksshymyz jeńiske jetti

ASTANA. KAZINFORM — Bolgarııa astanasynda ótip jatqan bokstan halyqaralyq «Strandja kýboginiń» úshinshi jarys kúninde taǵy tórt burymdy boksshymyz kelesi kezeńge ótti.

Keshki sessııada qazaq qyzdarynan jeti boksshy sharshy alańǵa kóterildi. Nátıjesinde onyń beseýi aıqastaryn jeńispen aıaqtasa, ekeýi jekpe-jekterin aıaqtap, kórermender qataryn tolyqtyrdy.

Naqtyraq aıtsaq, 52 keli salmaqta el namysyn qorǵaǵan Jansaıa Rahymberdi túrkııalyq qarsylasy Nýr Klıchchı Edany 5:0 esebimen jeńdi. 54 kelide synǵa túsip jatqan taǵy bir arýymyz Anel Saqysh ta túrkııalyq qarsylasy Laýren Makıeden 4:1 esebimen basym tústi.

Al 63 kelide judyryqtasyp jatqan otandasymyz Laýra Esengeldi Grekııa boksshysy Pavlına Papadatoýdy 5:0 esebimen qapy qaldyrdy. 52 keli salmaqta Jazıra Oraqbaeva bolgarııalyq boksshy Tala Habbasty 5:0 esebimen jarys jolynan taıdyrdyrsa, 54 keli salmaqta el namysyn qorǵap jatqan Symbat Alıasqar Irlandııa boksshysy Chloe Gabrıeldi 5:0 esebimen utty.

Ókinishke qaraı 54 keli salmaqta synǵa túsken Elına Bazarova men 63 keli salmaqtaǵy boksshymyz Arýjan Janǵabaeva ekeýi de túrkııalyq qarsylastaryna ese jiberdi.

Osyǵan deıin kúndizgi sessııada sharshy alańǵa shyqqan segiz boksshymyzdyń úsheýi jarysty sátti aıaqtap, kelesi aınalymǵa ótkenin, al onyń beseýi qarsylastaryna jol bergenin jazǵan edik.

Osylaısha búgin sharshy alańǵa shyqqan 15 burymdy boksshymyzdyń 8-i jeńiske jetti.