Strandja — 2025: Taǵy 3 boksshymyz alǵashqy jekpe-jekterin jeńispen aıaqtady

ASTANA. KAZINFORM — Bolgarııa astanasy Sofııa qalasynda ótip jatqan dástúrli halyqaralyq Strandja týrnırinde erler quramasynan taǵy úsh boksshymyz qarsylastaryn qapy qaldyryp, kelesi aınalymǵa ótti.

Atap aıtar bolsaq, 63.5 keli salmaqta el namysyn qorǵap jatqan Ertýǵan Zeınýllınov 1/8 fınalda jergilikti boksshy Vladıslav Lısovyımen kezdesip, tóreshilerdiń bir aýyzdan shyǵarǵan sheshimi boıynsha qarsylasyn jarys jolynan taıdyrdy. Esep — 5:0.

Endi ol kelesi shırek fınalda aıqasyn Ázerbaıjan eliniń ókili Rýslan Rýstamovqa qarsy ótkizedi.

Osy salmaqta taǵy bir otandasymyz Muhammedsabyr Bazarbaıuly da shırek fınalǵa ótti. Ol alǵashqy aıqasynda Grýzın boksshysy Saba Tkebýchavamen judyryqtasty. Alaıda qarsylasy qazaq boksshysyna qarymdy qarsylyq tanyta alǵan joq. Grýzın boksshysy úshinshi raýndta bokstasýdan bas tartty. Osylaısha jekpe-jek Muhammedsabyrdyń jeńisimen aıaqtaldy.

Al 80 kelige deıingi salmaqta synǵa túsken taǵy bir otandasymyz Erasyl Jaqpekov qarsylasyn birinshi raýndta nokaýtqa túsirdi. Ol alǵashqy jekpe-jegin pákistandyq Ýmaıs Ikbalǵa qarsy ótkizgen bolatyn. Otandasymyz qarsylasyn birinshi raýndta-aq nokaýtqa túsirdi. Tóreshi onǵa deıin sanaǵansha, qarsylasy ornynan tura alǵan joq.

Esterińizge sala ketsek, osyǵan deıin búgin sharshy alańǵa shyqqan tórt burymdy qyzymyzdyń úsheýi qarsylasyn qapy qaldyrsa, bireýi jarys jolyn aıaqtaǵanyn jazǵan edik.

Sondaı-aq, búgin jarystyń ekinshi kúni Qazaqstan quramasyndaǵy egiz boksshylar Nurbek Oralbaı men Aıbek Oralbaılar birinen keıin biri qarsylastaryn nokaýtpen jeńdi.

Sonymen birge Bekzat Nurdáýletov te óz kezeginde ózbek boksshysyn birinshi raýndta nokaýtqa túsirdi.

Ókinishke qaraı, atalǵan týrnırde erler arasynda 51 kelide el namysyn qorǵaǵan Bekzat Aldamjarov birinshi jekpe-jeginde qarsylasyna jol berip, kórermender qataryna qosyldy.