Strandja-2025: Qazaqstandyq boksshyǵa jarysqa shyǵýǵa shekteý qoıyldy

ASTANA. KAZINFORM – Bolgarııa astanasynda ótip jatqan bokstan halyqaralyq «Strandja kýbogynyń» tórtinshi jarys kúninde bir boksshymyzǵa jarysqa shyǵýǵa shekteý qoıylsa, ekinshi boksshymyz sharshy alańǵa shyǵa sala jaraqat alyp, jeńis qarsylasyna berildi.

Naqtyraq aıtsaq, 48 keli salmaqta el namysyn qorǵap jatqan Sanjar Táshkenbaı ırlandııalyq boksshy Lýıs Rýnımen jekpe-jektiń alǵashqy raýndynda qolyn jaraqattap, dárigerlerdiń kómegine júgindi. Ókinishke qaraı dárigerlerdiń keńesimen aıqas sońyna jetpeı aıaqtaldy.

Nátıjesinde jeńis qarsylasqa berildi. 

Sonymen qatar búgin 54 keli salmaqta óner kórsetetin boksshy Mahmud Sabyrhan da densaýlyǵyna baılanysty jarystan shettetildi.

Qazaqstan boks federatsııasynyń baspasóz qyzmeti málim etkendeı, ol tamaqtan ýlanyp qalǵan.

– Taǵamdyq ınfektsııa. 3 naýryzǵa deıin jarystarǵa qatyspaıdy, – delingen medıtsınalyq anyqtamada.

Búgingi jarysta Mahmud Sabyrhan kosovalyq Bajoký Bashkımmen judyryqtasýy tıis edi.
Sonymen qatar Mahmud Sabyrhan fınalǵa deıin jetkende ózbekstandyq eki dúrkin Olımpıada chempıony Hasanboı Dýsmatovpen kezdesýi múmkin dep josparlanǵan.

Esterińizge sala keteıik, osyǵan deıin búgin sharshy alańda kimderdiń judyryqtasatyny týraly jazǵan bolatynbyz.