Strandja-2025: El qorjynyna taǵy eki kúmis medal tústi

ASTANA. KAZINFORM - Bolgarııa astanasynda ótip jatqan bokstan halyqaralyq «Strandja kýbogynda» bokstan erler quramasynan fınaldyq kezeńde birinshi bolyp sharshy alańǵa shyqqan qazaqstandyq boksshy Danııal Sábıt qarsylasyna jol berip, kúmis júldeni qanaǵat tutty.

Naqtyraq aıtsaq, 51 keli salmaqta el namysyn qorǵaǵan otandasymyz túrkııalyq boksshy Samet Gýmýshpen qolǵap túıistirdi. Asa tartysty ótken jekpe-jek qorytyndysy boıynsha tóreshiler bir aýyzdan jeńisti túrik boksshysyna berdi.

Odan keıin sharshy alańǵa 54 keli salmaqta taǵy bir otandasymyz Tımýr Qabdeshov shyqty. Ol fınalda Ózbekstan boksshysy Shahzod Mýzafarovtan upaı sanymen utylyp, ekinshi kúmis júldeni qanjyǵasyna baılady.

Osylaısha bokstan erler quramasynan sharshy alańǵa shyqqan alǵashqy eki boksshymyz da qarsylastaryna tóreshiler sheshimimen jol berip, kúmis júldeger atandy.

Osyǵan deıin kórkem júzýden Parıjdegi Álem kýbogynda Qazaqstan taǵy bir medal alǵanyn jazǵan bolatynbyz.