Strandja-2025: burymdy boksshylarymyz fınalda taǵy eki kúmis, bir altyn júlde aldy

ASTANA. KAZINFORM — Búgin Bolgarııa astanasynda ótip jatqan bokstan halyqaralyq «Strandja kýbogynyń» fınalynda burymdy boksshylarymyz taǵy eki kúmis, bir altyn medal jeńip aldy. 

Altyn júldeni otandastarymyzdyń arasynan +81 keli salmaqta Lázzat Kúngeıbaeva qanjyǵasyna baılady. Ol aqtyq synda taǵy bir otandasymyz Dına Islambekovamen judyryqtasyp, qarsylasynan basym tústi. Osylaısha bir salmaqta altyn júldeni sarapqa salǵan otandastarymyzdyń biri chempıon atansa, ekinshisi kúmis júldeger atandy.

Sondaı-aq 81 kelige deıingi salmaqta el namysyn qorǵaǵan taǵy bir otandasymyz Jibek Jarasqyzy da kúmis júldeni qanaǵat tutty. Ol sheshýshi aıqasta qytaılyq Bý Rıdýmen qolǵap túıistirdi. Nátıjesinde qytaılyq boksshy tóreshiler sheshimimen jeńiske jetti.

Esterińizge sala keteıik, osyǵan deıin áıelder arasynda tórt qazaqstandyq boksshy «Strandja kýbogynyń» fınalynda qarsylastaryna jol berip, kúmis júldeger atanǵan bolatyn. Atap aıtar bolsaq, Áıgerim Sáttibaeva (48 keli), Ánel Saqysh (54 keli), Aıdana Zabynbekova (57 keli) jáne Rımma Volosenko (60 keli) el qorjynyna kúmis medal saldy. 

Sonymen qatar Bolgarııadaǵy halyqaralyq jarysta Bekzad pen Sabyrjan chempıondyq ataqqa jekpe-jeksiz qol jetkizdi.