Strandja-2025: Bekzad pen Sabyrjan chempıondyq ataqqa jekpe-jeksiz qol jetkizdi
ASTANA. KAZINFORM — Búgin Bolgarııa astanasynda ótip jatqan bokstan halyqaralyq «Strandja kýbogynyń» chempıondary anyqtalady.

Jarysty birinshi bolyp, kúndizgi sessııada burymdy boksshylar bastaıdy. Alaıda, erler arasynda jekpe-jekter bastalmaı turyp Bekzat Nurdáýletov atalǵan týrnırdiń chempıondyq ataǵyna qol jetkizdi. Bul týraly QR Boks federatsııasynyń baspasóz qyzmeti habarlady.
— Nurbek Oralbaı fınalǵa shyqpaıtyn boldy. Ol 86 kelide jolyn Bekzad Nurdáýletovke berdi. Nurbekke qurmet. Bekzat bul salmaqta chempıon boldy, - delingen habarlamada.
Sonymen qatar 75 keli salmaqtyń fınalynda joldary túıisken otandastarymyz Tımýr Nurseıitov pen Sabyrjan Aqqalyqov arasyndaǵy jek-jek te ótpeıtin boldy. Nurseıitov jaraqatyna baılanysty sharshy alańǵa shyǵýdan bas tartty. Osylaısha 75 kelide «Strandja» halyqaralyq týrnıriniń chempıondyq ataǵyna Aqqalyqov ıe boldy. Al Nurbek Oralbaı men Tımýr Nurseıitov kúmis júldege qol jetkizdi.
Aıta keteıik, otandastarymyz 1994 jyldan beri «Strandja» básekesine qatysyp kelse de, týrnırdiń tarıhynda birinshi ret bıyl fınalda qazaq boksshylarynyń joldary bir-birimen túıiskeli otyr.
Buǵan 25 boksshymyzdyń qatysýy men jerebe barysynda jerlesterimizdiń qos tarapqa túskeni sebep bolǵan.
Esterińizde bolsa atalǵan týrnırdiń fınalynda qazaq boksshylary bir-birimen judyryqtasatyny týraly osyǵan deıin jazǵan edik.