Stoýnhendj tastarynyń biri Shotlandııadan 750 shaqyrym jerden tasymaldanǵan

ASTANA. KAZINFORM – London ýnıversıtettik kolledjiniń (UCL) arheologtary Stoýnhendj tastaryn zerttep, olardyń bireýi Shotlandııadan ákelingenin anyqtady. Olardyń arasyndaǵy qashyqtyq 750 shaqyrymnan asady, dep jazady The Guardian. Bul týraly snob.ru habarlaıdy.

100 jylǵa jýyq ýaqyt boıy ǵalymdar tastardyń bir bóligi Ýelste (dinı ǵımarattan shamamen 200 shaqyrym jerde) óndirilgen dep sanady.

Stoýnhendjdiń ortalyq elementteriniń biri – Altar tasy buryn Ýelsten shyqqan dep eseptelgen, shyn máninde ol Shotlandııadan shyqqan. Ol eldiń soltústik-shyǵys shekarasynda ornalasqan Orkneı araldarynan ákelindi. Zertteýshilerdiń atap ótýinshe, bul jańalyq olardyń sońǵy neolıt jáne osy jerlerdiń ejelgi turǵyndary týraly túsinigin túbegeıli ózgertti. 

«Bul neolıt dáýirinde Brıtan araldaryndaǵy adamdar arasyndaǵy qarym-qatynas týraly túsinigimizdi túbegeıli ózgertedi. Bul taqyryp kóp jyldar boıy talqylanatyn bolady», - dedi UCL qurmetti aǵa ǵylymı qyzmetkeri Rob Ikser basylymǵa bergen suhbatynda.

Altar tasy – Stoýnhendjdegi eń tanymal tas emes. Ol tegis, qurylymnyń ortasynda jatyr jáne basqa megalıtterdiń artyna jasyrylǵan – kelýshiler ony baıqamaı da qalady. Stoýnhendjdiń syrtqy sheńberi (eń áıgili) qurylymnan 25 shaqyrym qashyqtyqta ornalasqan jergilikti tastardan qurastyrylǵan, al ishindegi tastar Ýelsten ákelingen.