StormWall: Iran men Izraılge kıbershabýyldar rekordtyq deńgeıge jetti

ASTANA. KAZINFORM — Taıaý Shyǵystaǵy shıelenistiń aıasynda Iran men Izraıl 2025 jyldyń ekinshi toqsany qorytyndysy boıynsha kıbershabýyldar sany eń kóp elder bestigine endi, dep habarlaıdy Kazinform agenttiginiń menshikti tilshisi.

Izraıl jalpy DDoS-shabýyldardyń 8,4%-ymen álemdik reıtıngte tórtinshi oryndy ıelense, Iran 8,1%-dyq úlesimen besinshi orynǵa jaıǵasty. Eki el de saıası ýájben áreket etetin haktıvıster tarapynan buryn-sońdy bolmaǵan shabýyldarǵa ushyraǵan.

StormWall dereginshe, 2025 jyldyń ekinshi toqsanynda DDoS-shabýyldar kólemi ótken jyldyń sáıkes kezeńimen salystyrǵanda 108%-ǵa artqan. Kıbershabýyldardan eń kóp zardap shekken elder tiziminde dástúrli túrde AQSh kósh bastap tur – shabýyldardyń 12,6%-y osy elge tıesili. Odan keıin Qytaı (10,4%) men Úndistan (9,2%) ornalasqan. Sarapshylar bul elderdiń geosaıası ahýaly men ekonomıkalyq damýy olardyń osaldyǵyn arttyryp otyrǵanyn aıtady.

Kıbershabýyldardyń negizgi nysanasyna aınalǵan elderdiń ondyǵyna Eýropa memleketteri de kirdi. Germanııa 7,6%-ben altynshy, al Ulybrıtanııa 7,3%-ben jetinshi orynda. Bul elderge qarsy shabýyldar tek kıberqylmyskerler tarapynan ǵana emes, saıası sheshimderge qarsylyq bildirýshi haktıvıster tarapynan da jasalǵan.

Ádette úzdik bestikten túspeıtin Reseı bul joly segizinshi orynǵa túsken (6,4%). Bul kezeńde BBMT (EGE) men joǵary oqý oryndarynyń qabyldaý komıssııalary jumysyna kedergi keltirýdi kózdegen jasóspirimderdiń jappaı shabýyldary tirkelgen.

Tizimdi Saýd Arabııasy (5,3%) men Sıngapýr (5,1%) qorytyndylaıdy. Saýd Arabııasy – óńirdegi yqpaldy el jáne onda munaı-gaz, qarjy salalary shoǵyrlanǵan. Al Sıngapýr damyǵan ekonomıkasy arqasynda kıberqylmyskerler úshin tartymdy nysan sanalady.

Buǵan deıin Ázerbaıjan bıligi kıbershabýyldar sanynyń ósýine baılanysty strategııalyq nysandardyń kıberqaýipsizdigine baqylaýdy kúsheıtkeni habarlanǵan.