Stopfake: Ujymdyq ımmýnıtet teorııasynyń vaktsınatsııaǵa eshqandaı qatysy joq
NUR-SULTAN. QazAqparat - Áleýmettik jelini paıdalanýshylar ujymdyq ımmýnıtet vaktsınatsııamen baılanysty emes degen aqparatty taratýda. Avtorlar doktor Artýr Hedrıchtiń 1932 jylǵy zertteýine súıenedi. Alaıda zertteý qorytyndylary burmalanǵan, dep habarlaıdy QazAqparat stopfake.kz saıtyna silteme jasap.
Telegram-arnadaǵy silteme «Medalternatıva.ınfo» saıtyna jáne «Ujymdyq ımmýnıtet teorııasynyń vaktsınatsııaǵa eshqandaı qatysy joq» degen aqparatqa aparady.
Avtordyń pikirinshe, doktor Artýr Hedrıchtiń AQSh-tyń jekelegen aımaqtarynda qyzylsha aýrýy týraly zertteýiniń qorytyndysy bul taqyrypqa dálel bolyp tabylady.
«Juqpaly aýrýǵa shaldyqqan jáne oǵan tabıǵı ımmýnıteti qalyptasqan ujym (qaýymdastyq) músheleri neǵurlym kóp bolsa, aýrýdyń búkil ujymǵa (qaýymdastyqqa) tıgizetin qaýpi soǵurlym az bolady».
Avtor keıinnen bul tujyrym bylaı burmalanǵan dep sanaıdy: «Top músheleri juqpaly aýrýǵa qarsy qanshalyqty kóp vaktsınatsııalansa jáne oǵan qarsy ımmýnıtet paıda bolsa, aýrýdyń búkil ujymǵa (qaýymdastyqqa) tıgizetin qaýpi soǵurlym az bolady».
«Aıla-sharǵyny baıqadyńyz ba? Aıaq astynan juqpaly aýrýmen baılanystyń mańyzdylyǵy joıylyp, vaktsınatsııamen almastyryldy, tabıǵı ımmýnıtettiń mańyzdylyǵy tómendedi», – delingen áleýmettik jelilerde taratylǵan habarlamada.
Shyn máninde, Hedrıchtiń 1930-1932 jyldary jarııalanǵan baqylaýlary men tujyrymdary ǵalymdardy qyzylshany jeńý úshin vırýsqa qarsy ımmýnıteti bar popýlıatsııany kóbeıtý kerek degen oıǵa ıtermeledi. Keıinnen qyzylshaǵa qarsy baǵdarlama ázirlendi, oǵan nárestelerdi josparly ımmýndaý jáne mektepke qabyldanǵan kezde balalardy ımmýndaý kirdi. Árıne, Hedrıchtiń esepterindegi tujyrymdar ózgergen joq. Bul manıpýlıatsııa.
Habarlamadaǵy taǵy bir tezıs:
«Hedrıchtiń ujymdyq ımmýnıtet teorııasy vaktsınadan qalyptasqan jasandy ımmýnıtet tabıǵı ımmýnıtetke uqsas degen mıfpen burmalanǵan, bul durys emes».
Ujymdyq ımmýnıtet uǵymyna keletin bolsaq, bul termın halyqtyń basym bóligi vırýsqa qarsy ımmýnıtetke ıe bolǵan jaǵdaıdy sıpattaý úshin qoldanylady.
Ujymdyq ımmýnıtet tabıǵı túrde paıda bolady nemese vaktsınatsııa arqyly qalyptasady. Ekinshi túri joǵary juqpaly vırýstarmen, mysaly, qyzylsha vırýsymen kúresý úshin qajet. Bir naýqastan indetti 12-18 adam juqtyrýy múmkin. Ǵalymdardyń kópjyldyq zertteýleri qyzylshaǵa qarsy ujymdyq ımmýnıtet qalyptasýy úshin halyqtyń 95%-y egilýi tıis ekenin kórsetti.
COVID-19 qyzylshaǵa qaraǵanda az juǵady, biraq ólim deńgeıi joǵary. Keıbir ǵalymdardyń pikirinshe, ujymdyq ımmýnıtetti qalyptastyrý úshin halyqtyń 60-70%-ynda antıdeneler bolýy kerek.
«DDSU aýrýdy halyq arasynda taratý arqyly emes, vaktsınatsııa arqyly «ujymdyq ımmýnıtetke» qol jetkizýdi qoldaıdy, óıtkeni bul aýrý juqtyrý jaǵdaılaryna jáne ólimge ákelýi múmkin», – delingen DDSU saıtynda.
