Stopfake.kz: Mektepterde bıometrııalyq derekter jınalatyny týraly aqparat - jalǵan
QR Bilim jáne ǵylym mınıstrligi bul aqparatty joqqa shyǵardy, dep habarlaıdy QazAqparat stopfake.kz saıtyna silteme jasap.
Áleýmettik jelilerde ata-analarǵa balalardy pedagogtardan jasyrynýǵa úıretýge keńes berilýde. Óıtkeni mektepterde jasyryn túrde balalardyń bıometrııalyq málimetteri alynady jáne olardy kez kelgen ýaqytta sabaqtan belgisiz baǵytta alyp ketýi múmkin. Bul aqparat shyndyqqa janaspaıdy.
– Balaǵa qatysty barlyq is-áreketter ata-analarmen kelisilýi kerek. Bul rette sabaq kezinde qandaı da bir is-sharalar ótkizýge jol berilmeıdi. Bıometrııalyq derekterge kelsek, bul jeke málimetter bolyp tabylady. Pedagogtarǵa olardy jınaýdyń qajeti joq, – dep habarlady QR BǴM.
Qazaqstanda kórineý jalǵan aqparat taratqany úshin QR Qylmystyq kodeksiniń 274-babyna sáıkes qylmystyq jaýapkershilik qarastyrylǵan. Barshańyzdy tek resmı aqparatqa ǵana senýge shaqyramyz! Jańalyqtyń shynaıylyǵyn bizdiń portaldyń kómegimen tekserýge bolady. Ózińizdi qyzyqtyrǵan aqparatty t.me/stopfake_kz Telegram-arnasyna nemese +7 707 739 5599 WhatsApp nómirine jiberińiz.
