Stopfake: Qazaqstanda adam aǵzasy saýdasyna baılanysty jalǵan aqparat tarap jatyr

Keıbireýleriniń pikirinshe, bul medıtsınalyq kómek kórsetýdiń sapasyna áser etýi múmkin, óıtkeni dárigerler úshin patsıentti aýrýdan emdegennen góri, onyń múshelerin alý tıimdirek bolýy múmkin. Bul jalǵan.

Patsıentterdiń ólimnen keıingi donorlyqtan bas tartý nemese kelisý týraly aqparatty elektrondyq densaýlyq pasporttaryna engizý josparlanyp otyrǵandyqtan, keıbir azamattar alańdaýshylyq bildirýde.

Olardyń aıtýynsha, elektrondy densaýlyq pasporttary áleýetti donorlardyń málimetter bazasyna aınalýy múmkin, sodan keıin dárigerler tizimde kórsetilgenderdi emdeýdi ádeıi toqtatady.

QR Densaýlyq saqtaý mınıstrligi donorlyqqa kelisim berý nemese bas tartý týraly aqparat eldiń barlyq medıtsına qyzmetkerleri úshin ashyq jáne qoljetimdi emes ekenin túsindirdi.

«2020 jylǵy 7 shildedegi «Halyq densaýlyǵy jáne densaýlyq saqtaý júıesi týraly» kodekstiń 209-babynyń 8-tarmaǵyna sáıkes, aǵzalardyń qaıtys bolǵannan keıin donorlyǵyna quqyǵyn bildirgen azamattardyń tirkelimine ýákiletti organ aıqyndaǵan tártippen Transplantattaý jónindegi úılestirý ortalyǵynyń ýákiletti adamdarynyń ǵana qol jetkizýi múmkin bolady», – dep habarlady vedomstvodan.

Sonymen qatar, Kodekstiń osy babynyń 4-tarmaǵyna sáıkes, Qazaqstanda adamnan aǵzalaryn májbúrlep alýǵa; adamdy óziniń aǵzasyn berýge májbúrleýge, adamnyń aǵzalary men tinderin satyp alýǵa-satýǵa tyıym salynady. Sondaı-aq, Kodeks áreketke qabiletsiz adamdardan, azamattyǵy joq adamdardan, kámeletke tolmaǵandardan jáne qaıtys bolǵan kezde jeke basy anyqtalmaǵan adamdardan tinder men múshelerdi alýǵa tyıym salady.

Qoryta aıtqanda, ólimnen keıingi donorlyqqa kelisý nemese odan bas tartý týraly derekterdiń jalpyǵa qoljetimdi bolatyny týraly alańdaýǵa negiz joq. Taratylyp jatqan habarlamada QR zańdaryna qaıshy keletin aqparat usynylǵan.