«STOP týberkýlez» aktsııasy: Bir aıda 75 elordalyqta syrqat belgileri anyqtaldy
NUR-SULTAN. QazAqparat - Nur-Sultanda 23 qyrkúıek pen 23 qazan aralyǵynda ótken «STOP týberkýlez» aktsııasy qorytyndylandy, dep habarlaıdy QazAqparat elorda ákimdiginiń resmı saıtyna silteme jasap.
Shara ákimdiktiń bastamasymen jáne qalalyq Qoǵamdyq densaýlyq saqtaý basqarmasynyń uıymdastyrýymen ótti. Aktsııa músheleri halyq kóp jınalatyn oryndardy aralap, tekserý júrgizdi. Onyń ishinde qaladaǵy saýda ortalyqtary, bazarlar jáne turǵyn úı alaptaryn aralady. Degenmen, basymdyq qala shetindegi eldi mekenderge berildi.
«Sondaı-aq, qaladaǵy emhanalarda ashyq esik kúni uıymdastyrylyp, turǵyndar arasynda túsindirý jumystary ótkizildi. Odan bólek, JOO-lar qamtyldy. ıAǵnı, astanalyq 4 oqý ornynda flıýorografııalyq tekserý jumysy uıymdastyryldy», - dedi Nur-Sultan qalalyq Qoǵamdyq densaýlyq saqtaý basqarmasy basshysynyń orynbasary Álııa Rústemova ákimdikte ótken baspasóz máslıhatynda.
Onyń aıtýynsha, týberkýlezge qarsy uıymdastyrylǵan aktsııa 14 myń adamdy qamtydy. «Nátıjesinde, 75 adamda týberkýlez aýrýynyń belgileri bar bolyp shyqty. Arnaıy tekserýlerden keıin onyń 9-ynda týberkýlez anyqtaldy. Bul baǵyttaǵy jumystar óz jalǵasyn tabady. Aldaǵy ýaqytta jumys kúnderi múmkindikteri bolmaıtyn azamattar úshin demalys kúnderi tekserý jáne anyqtaý sharalary uıymdastyrylatyn bolady», - dedi ol.
Qalalyq ftızıopýlmonologııalyq ortalyqtyń málimetine súıensek, elordada sońǵy 5 jylda atalǵan aýrýǵa ushyraǵandar sany 1,5 esege azaıǵan.
