«Stop-trafık» sharasynyń barysynda 56 jeńgetaı men 341 jezókshe arnaıy esepke qoıyldy
ASTANA. Aqpannyń 17-si. QazAqparat /Aıdar Ospanalıev/ - «Stop-trafık» jedel-saýyqtyrý sharasynyń barysynda 3 adamdy saýdalaý 3 adamdy urlaý áreketi anyqtaldy.
Sondaı-aq osy sharalar kezinde 5 azamatty erkinen aıyryp, qamaýda ustaý, 5 jezókshelikpen aınalysýǵa májbúrleý jáne 42 jeńgetaılyqpen baılanysty áreketter anyqtalyp, áshkerelendi. Bul týraly búgin jýrnalıstermen bolǵan brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov aıtty, dep habarlaıdy QazAqparat.
Onyń aıtýynsha, atalmysh shara aqpannyń 8-i men 12-si aralyǵynda respýblıka aımaǵynda adam saýdasy men azamattardy urlaý jáne olardy erkinen aıyryp, paıdaǵa asyrý maqsatyndaǵy áreketterdiń jolyn kesý maqsatynda júzege asyrylǵan. «Shara barysynda 56 jeńgetaı men 341 jezókshelikpen aınalysyp júrgen qyzdar arnaıy esepke qoıyldy. Al ishki ister salasynyń arnaıy mekemelerine aty-jónderin anyqtaý maqsatynda 66 azamat ornalastyryldy. Olardyń 8-i kámeletke tolmaǵan jasóspirimder. Sondaı-aq jezókshelikpen aınalysyp júrgen 22 TMD azamattary esepke qoıyldy», dedi departament bastyǵy.
Sondaı-aq onyń málimetterine qaraǵanda, jedel-saýyqtyrý sharasy barysynda almatylyq polıtseıler ótken jyly Almaty oblysynyń kámeletke tolmaǵan úsh jasóspirim qyzyn qalaǵa aldap ákelip, seksýaldyq qyzmetke paıdalanǵan azamattardy ustady. Atalmysh áreket boıynsha qylmystyq is qozǵaldy.
Q.Jumanov buǵan qosa Shyǵys Qazaqstan oblysynda Rıder qalasynyń turǵynyn 7 aı boıy zorlyqpen ustap, qara jumysqa paıdalanyp kelgen ormanshynyń ustalǵandyǵyn aıtty.
