«STOP trafık» sharasy barysynda respýblıka aýmaǵynda adam saýdasyna qatysty 69 qylmys anyqtaldy
ASTANA. QazAqparat - Aǵymdaǵy jylǵy 26-28 naýryz kezeńinde respýblıka aýmaǵynda «STOP-trafık» jedel-profılaktıkalyq is-sharasy barysynda krımınaldyq polıtsııa qyzmetkerleri adam saýdasymen baılanysty 69 qylmysty anyqtady.
«Onyń ishinde adam saýdasynyń 13, kámeletke tolmaǵandardy jezókshelikpen aınalysýǵa tartýdyń 3, kámeletke tolmaǵandy satýdyń jáne paıdalaný maqsatynda adam urlaýdyń 1, jezókshelikpen aınalysýǵa tartýdyń 9, sondaı-aq jezókshelikpen aınalysý úshin prıton uıymdastyrý nemese ustaý jáne jeńgetaılyqtyń 42 faktisi belgili boldy», - delingen QR ІІM Krımınaldyq polıtsııa departamentiniń málimetinde.
Máselen, jedel is-sharalar júrgizý barysynda Almaty qalasynyń ІІD UQQKB qyzmetkerleri osy qalada turatyn áıel adamdy ustady. Ol 2014 jyly týý týraly kýálikti qoldan jasaý arqyly aldyn ala sóz baılasyp, jańa týǵan náresteni odan ári tárbıeleý úshin birneshe myń AQSh dollaryna satyp alǵan. Qylmystyq Kodekstiń 135-baby 2-bóligi boıynsha qylmystyq is qozǵaldy.
Budan bólek, Mańǵystaý oblysynyń ІІD Uıymdasqan qylmysqa qarsy kúres basqarmasy 28 jastaǵy Aqtaý qalasynyń turǵynyn anyqtap, ustady. Ol ózimen qurdas qyzdy urlap áketip, qala syrtyna shyǵaryp, ony páterde zańsyz ustap otyrǵan. Bul fakti boıynsha Qylmystyq Kodekstiń 125-baby 3-bóliginiń 2-tarmaǵy boıynsha qylmystyq is qozǵaldy.
«STOP trafık» sharasy barysynda Shyǵys Qazaqstan oblysynyń ІІD UQQ KB qyzmetkerleri sharýa qojalyǵynda 24 jastaǵy oblys turǵynyn zańsyz eńbekte paıdalaný faktisin qujattandyrdy. Qylmystyq Kodekstiń 128-baby 1-bóligi boıynsha qylmystyq is tergelýde.
