«Stop-kredıt» qyzmetin 6,3 mln adam paıdalanǵan
ASTANA. KAZINFORM – Qarjy naryǵyn retteý jáne damytý agenttigi azamattardy qarjylyq alaıaqtyqtan qorǵaýǵa arnalǵan «Stop-kredıt» qyzmetin paıdalaný tártibin eske saldy.
Vedomstvonyń málimetinshe, árbir azamat óz atyna banktik qaryzdar men mıkrokredıtterdi resimdeýge erikti túrde tyıym sala alady. Bul qyzmet eGov.kz portalynda jáne eGov Mobile mobıldi qosymshasynda qoljetimdi.
Qyzmetti kompıýter arqyly qosý úshin egov.kz portalyndaǵy jeke kabınetke kirip, «Servıster» bóliminen «Banktik qaryzdar, mıkrokredıtter alýdan erikti túrde bas tartý» qyzmetin tańdaý qajet. Odan keıin elektrondyq nysandy toltyryp, ótinimge elektrondyq tsıfrlyq qoltańbamen qol qoıý kerek. Qyzmet nátıjesi «Qyzmetterdi alý tarıhy» bóliminde kórsetiledi.
eGov Mobile qosymshasy arqyly qyzmetti paıdalaný úshin basty bettegi «Tanymal qyzmetter» bóliminen «Qaryzdar men mıkrokredıtterden bas tartý» servısin tańdap, qajetti derekterdi engizip, ótinimdi ETsQ arqyly rastaý jetkilikti.
– Qyzmet iske qosylǵannan keıin azamattyń kredıttik tarıhynda qaryz alýǵa tyıym salynǵany týraly belgi paıda bolady. Bul aqparat kredıttik bıýrolar arqyly bankter men mıkroqarjy uıymdaryna qoljetimdi bolady. Eger belgilengen tyıymǵa qaramastan azamattyń kelisiminsiz qaryz resimdelse, mundaı qaryz esepten shyǵarýǵa jatady, – dep málimdedi agenttik.
Sondaı-aq vedomstvo qajet bolǵan jaǵdaıda azamattardyń bul shekteýdiń kúshin kez kelgen ýaqytta alyp tastaı alatynyn atap ótti. Alaıda atalǵan tyıym kredıttik bıýrolardyń derekterin paıdalanbaıtyn lombardtar men ózge de uıymdarǵa qoldanylmaıdy.
– 2026 jylǵy 1 maýsymdaǵy jaǵdaı boıynsha «Stop-kredıt» servısi 6,3 mıllıon ret paıdalanyldy, – dep habarlady agenttik.
Agenttik qarjylyq saýattylyqqa qatysty ózge de paıdaly materıaldar Fingramota.kz saıtynda qoljetimdi ekenin málimdedi.
Aıta keteıik, alaıaqtar atyńyzǵa nesıe rásimdemes úshin ne isteý kerektigin mynaý siltemeden de oqı alasyz.
