«Stop-kredıt»: alaıaqtardan qalaı qorǵanýǵa bolady

ASTANA. KAZINFORM – Qarjylyq alaıaqtyqtan qorǵaný úshin qaryzdardy resimdeýden erikti túrde bas tartý qyzmeti qoldanylady. Árbir azamat banktik kredıtter men mıkrokredıtter alýǵa tyıym salý qoıa alady. «Stop-kredıt» dep atalatyn qyzmet portalda jáne E-gov mobıldi qosymshasynda qoljetimdi.

Qyzmetti kompıýterden iske qosý úshin egov.kz saıtynda jeke kabınetke kirip, «Servıster» bólimin ashyp, «Banktik qaryzdar, mıkrokredıtterdi alýdan erikti túrde bas tartýdy» tańdap, elektrondyq nysandy toltyryp, ótinishke ETsQ-men qol qoıý qajet, nátıjesi «Qyzmetterdi alý tarıhy» bóliminde kórsetiledi.

Qarjy naryǵyn retteý jáne damytý agenttigi málimetinshe qyzmetti sondaı-aq E-gov mobıldi qosymshasy arqyly paıdalanýǵa bolady. Ol úshin «Qyzmetter» bóliminde «Salyqtar men qarjy» tańdaý kerek, sodan keıin «Kredıt alýdan erikti túrde bas tartý» qyzmetin tańdaý qajet. Osydan keıin derekterdi toltyryp, suranysty elektrondy túrde rastaý qajet.

Qyzmetti iske qosqannan keıin kredıttik tarıhta qaryz alýdan bas tartý týraly belgi paıda bolady. Kredıttik bıýrolarǵa júginetin bankter men mıkroqarjy uıymdaryna bul aqparat qoljetimdi bolady. Kredıt alýǵa ótinim túsken jaǵdaıda qarjy uıymdary ony berýden bas tartý týraly sheshim qabyldaıdy. Eger belgilengen tyıym salýǵa qaramastan, qaryz sizdiń kelisimińizsiz resimdeletin bolsa, onda ol esepten shyǵarýǵa jatady.

Qajet bolǵan jaǵdaıda qyzmetti kez kelgen ýaqytta joıýǵa bolady. Bul rette, mundaı shekteý qaryz alýshylardy tekserý úshin kredıttik bıýrolardy paıdalanbaıtyn lombardtar men basqa uıymdarǵa qoldanylmaıtynyn aıta ketý kerek.

Eske salaıyq, Qarjy naryǵyn retteý jáne damytý agenttiginiń tóraǵasy Mádına Ábilqasymova bankterdiń adamnyń alaqany arqyly tólem jasaý júıesin engizýine qatysty pikir aıtty.

Ol jańadan engiziletin qarjy salasyndaǵy tehnologııalar qaýipsizdik turǵysynda tyńǵylyqty tekserýden, baǵalaýdan ótýi kerek ekenin atap ótti.