Stomatologtyń anestezııasyz balanyń tisin julýǵa quqyǵy bar ma
ASTANA. KAZINFORM – Áleýmettik jelilerdegi jazbalardyń astyna qoldanýshylar keıbir stomatologtardyń balalarda kezdesetin preparattarǵa qarsy allergııalyq áserden qorqyp, anestezııasyz (aýyrtpaıtyn protsedýra) tis julatynyn aıtyp, shaǵymdanǵan.
Osy oraıda Kazinform agenttiginiń tilshisi máseleniń mán-jaıyn bilý úshin Densaýlyq saqtaý mınıstrligine júgindi.
«Eń aldymen, medıtsınalyq standarttarǵa sáıkes balalarda analgetıkterdi qoldanbaı tisterdi julý týraly sheshim daýly ekenin atap ótken jón. Ambýlatorııalyq jaǵdaıda mamandandyrylǵan medıtsınalyq kómek kórsetýdi medıtsınalyq kómek kórsetý qaǵıdalary men standarttaryna sáıkes oblystardyń, respýblıkalyq mańyzy bar qalalardyń jáne Astananyń jergilikti memlekettik densaýlyq saqtaý basqarmasy belgileıdi. MÁMS júıesindegi ambýlatorııalyq jaǵdaıdaǵy mamandandyrylǵan medıtsınalyq kómek halyqtyń jekelegen sanattaryna shuǵyl jáne josparly túrde stomatologııalyq kómek kórsetýdi qamtıdy, - delingen mınıstrliktiń Kazinform agenttigi redaktsııasynyń resmı saýalyna bergen jaýapta.
Sondaı-aq, Densaýlyq saqtaý mınıstrligi tegin medıtsınalyq kómektiń kepildendirilgen kólemi sheńberinde jáne MÁMS júıesinde ambýlatorııalyq jaǵdaıda mamandandyrylǵan medıtsınalyq kómek kórsetý klınıkalyq hattamaǵa, sonymen qatar patsıenttiń shuǵyl jáne josparly stomatologııalyq kómek kórsetý jónindegi ótinishine sáıkes kórsetiletindigin aıtyp otyr.
Odan bólek, medıtsınalyq kómektiń qaýipsizdigi men sapasyn qamtamasyz etý úshin medıtsınalyq qoǵamdastyqpen kelisilgen aýyrsynýdy basýdyń balamaly ádisterin qoldaný, sondaı-aq «Qazaqstan Respýblıkasynda stomatologııalyq kómek kórsetýdi uıymdastyrý standartyn bekitý týraly» Densaýlyq saqtaý mınıstri buıryǵynyń talaptaryn saqtaý usynylady.
«Anestezııany talap etetin jáne patsıenttiń allergologııalyq anamnezin anyqtaý qajet bolǵan jaǵdaıda ony «Qazaqstan Respýblıkasynda allergologııalyq jáne ımmýnologııalyq kómek kórsetýdi uıymdastyrý standartyn bekitý týraly» Densaýlyq saqtaý mınıstriniń buıryǵyna sáıkes dárilik allergııany anyqtaý úshin zerthanalyq tekserýge jiberý qajet», - deıdi vedomstvodan.
