Stomatologtardyń Halyqaralyq Kongressi Astana qalasynda ótti
ASTANA. QazAqparat - Tis aýrýy eń keń taralǵan aýrý. Ol aýyrsa, kishkentaı bala túgili, úlken kisiler mazalanyp, esi ketedi. Keńes zamanynda oǵan jurt onsha kóńil bóle qoımaıtyn, qazirgi tańda tis dárigeri joǵary qurmet kórsetiletin qajetti mamandyqtyń biri.
Aıta keteıik, jýyrda Almaty qalasynda Qazaqstan Respýblıkasy Densaýlyq saqtaý mınıstrliginiń Ǵylym jáne adamı resýrstar departamenti S.J.Asfendııarov atyndaǵy Qazaq Ulttyq medıtsına ýnıversıtetiniń stomatologııa fakýlteti, Almaty dıplomnan keıingi bilim berý stomatologııalyq ınstıtýty jáne «KAZDENTEXPO - 2017» halyqaralyq mamandandyrylǵan stomatologııalyq kórmesimen birigip «Qazirgi zamannyń stomatologııanyń ózekti problemalary» atty V - halyqaralyq kongresi jáne Qazaqstan stomatologtarynyń VІІІ sezi ótken bolatyn.
Al, Astana qalasynda «Stomatologııadaǵy ınnovatsııalar» atty stomatologtardyń Halyqaralyq Kongressi Dúnıejúzilik stomatologtar Federatsııasynyń Prezıdenti Patrick Hescot-tyń qatysýymen júzege asyryldy. Sapar sheńberinde FDI Prezıdentiniń Qazaqstan Respýblıkasy Densaýlyq saqtaý mınıstrliginiń, Respýblıkalyq Densaýlyq saqtaýdy damytý ortalyǵynyń, Ulttyq Densaýlyq saqtaý palatasynyń basshy quramymen kezdesý josparlanyp otyr. Atalmysh Kongress Qazaqstan Respýblıkasynyń stomatologııalyq qyzmetin jańa jaǵdaılarda damytý strategııasynyń máselelerine arnalǵan.
Esterińizge sala keteıik, 2016 jyly Biryńǵaı Qazaqstandyq stomatologtar Assotsıatsııasy Dúnıejúzilik stomatologtar Federatsııasynyń quramyna kirgen bolatyn. Sondaı-aq, Dúnıejúzilik stomatologtar Federatsııasynyń quramynda Qazaqstan stomatologtarynyń Ulttyq Komıteti qurylǵan edi. Oǵan Qazaqstandyq stomatologtar assotsıatsııasy jáne Biryńǵaı Qazaqstandyq stomatologtar assotsıatsııasy endi.
Búgingi tańda Qazaqstanda eki stomatologııalyq qaýymdastyq belsendi jumys isteıdi: Qazaqstan stomatologııalyq qaýymdastyǵy jáne Biryńǵaı Qazaqstan stomatologtar qaýymdastyǵy.
Bir qyńjyltanyny, Qazaqstanda stomatolog dárigerler jetispeıdi. Al bet-jaqsúıek hırýrgtary joqtyń qasy. Sol sebepten Densaýlyq saqtaý Ulttyq Palatasy stomatologtar Komıteti stomatologııalyq aýrýlardyń profılaktıkasynyń memlekettik baǵdarlamasyn shyǵarýdy ótindi.
Qazirgi ýaqytta elimizde 2611 stomatologııalyq uıym jumys isteıdi. Onyń 60 paıyzy qalada, al qalǵan 40 paıyzy - aýylda ornalasqan. Deı tura, memlekettik jáne memlekettik emes stomatologııalyq kabınetterdiń jyldyq ósimi 725 birlikti quraıdy. Naqtyraq aıtatyn bolsaq, 2611 uıymnyń 920-synyń memlekettik menshik nysany bar, bul 35,2% quraıdy. Respýblıkada 15 memlekettik stomatologııalyq emhana jumys isteıdi. 2016-2017 jyldary onyń ekeýi jekeshelendirýge qoıylǵan.
Bıyl jyl basynda elimizde halyqqa stomatologııalyq kómek kórsetý standarty bekitildi. Onyń nátıjesinde stomatologııalyq kómektiń sapasyn arttyrý múmkin boldy. Jańa qujatta tis dárigerine, stomatologııalyq gıgıenıstke, dantıstke, jáne dáriger-stomatologqa qoıylatyn mamandyq talaptar qalyptastyryldy.
Qazirgi ýaqytta Ulttyq Densaýlyq saqtaý palatasynyń Stomatologııa komıteti tegin medıtsınalyq kómektiń kepildik berilgen kólemi sheńberinde stomatologııalyq qyzmet kórsetýge arnalǵan tarıf qunyn ósirý jaǵyna jikteýishti qaıta qaraý jóninde usynystar berdi.
Sondaı-aq, Densaýlyq saqtaý mınıstrliginiń qaraýynda Biryńǵaı Qazaqstan stomatologtar qaýymdastyǵy ázirlegen Stomatologııalyq aýrýlardyń aldyn alý baǵdarlamasynyń jobasy, QR DSM jáne QR BǴM-niń balalar men jasóspirimderdiń stomatologııalyq densaýlyǵyn jaqsartý týraly birlesken buıryǵynyń jobasy tur.
