Stomatologııalyq kabınetterde «S» gepatıtin juqtyrý múmkindigi joqqa shyǵarylmaıdy - Bas sanıtarlyq dáriger
Astana. Naýryzdyń 16-sy. QazAqparat/ Gúlmıra Álıakparova/ - Búgin QR Densaýlyq saqtaý mınıstrliginde ótken baspasóz máslıhatynda QR Bas sanıtarlyq dárigeri Keńes Ospanov stomatologııalyq kabınetterde «S» gepatıtin juqtyrý múmkindigi joqqa shyǵarylmaıtynyn málim etti,
dep habarlaıdy QazAqparat.
Keńes Ospanov atap kórsetkenindeı, Densaýlyq saqtaý mınıstrligi ústimizdegi jyly qańtardyń 15-inen bastap, sanıtarlyq erejeler men normalar talaptarynyń saqtalýyna respýblıkanyń stomatologııalyq jáne kosmetologııalyq uıymdaryna tekseris júrgize bastady. El aýmaǵynda jumys isteıtin 1869 (barlyǵy 2029) stomotologııanyń 677-sinde epıdemııaǵa qarsy jáne zararsyzdandyrý talaptarynyń buzylyp otyrǵandyǵy anyqtaldy. Tekseris barysynda stomatologııa qyzmetkerleriniń 7996-sy «V» jáne «S» vırýsty gepatıtine tekserilgendigi málim bolǵan. Zerthanalyq saraptama olardyń 58-inde gepatıttiń «V», 48-inde «S» vırýsyna oń nátıje bergen. «Tekserý nátıjeleri boıynsha anyqtalǵan buzýshylyqtardy joıý úshin 864 uıǵarym, 981 aıyppul salyndy. Sondaı-aq 244 qyzmetker jumystan shettetilip, 44 stomatologııalyq nysannyń jumysy ýaqytsha toqtatyldy», dedi K. Ospanov.
