Stomatolog, lor dárigerleri bas jáne moıyn isigin dıagnostıkalaýdy úırenedi
ALMATY. QazAqparat - Almaty, Astana, Qaraǵandy, Shymkent, Aqtóbe jáne Semeı qalalarynda Qazaqstan men Reseıdiń jetekshi onkologtary tarapynan otolarınologııa jáne stomatologııa salalaryndaǵy mamandar moıyn qaterli isiginiń erte kezeńin dıagnostıkalaý ádisi boıynsha oqytýdan ótedi. Bul týraly QazORǴZI dırektory Dılıara Qaıdarova baspasóz konferentsııasynda aıtty, dep habarlaıdy QazAqparat tilshisi.
Dárigerlerdiń aıtýynsha, Qazaqstanda bas jáne moıyn qaterli isigimen aýyratyndardyń 70 paıyzy 3-4 kezeńine jetkende ǵana kómekke júginedi.
«Qazaqstanda jyl saıyn bas jáne moıyn qaterli isigimen 2000-nan astam adam aýyrady. Adamdar zaqymdalý aımaǵy - aýyz qýysy, kómeı, muryn qýysyna nazar aýdarý kerek. Ádette naýqastar bizge aýrýdyń 3, 4-kezeńinde ǵana qaralýǵa keledi. Mundaı patsıentterdiń kómeıiniń jartysyn, muryn qýysy jáne aýyz qýysynyń ózge de organdar men tynys joldaryn alyp tastaýǵa týra keledi. Emdeýdiń tıimdi ádisteriniń bar bolǵanyna qaramastan, dıagnoz qoıylǵan soń naýqastar arasyndaǵy ólim 50%-ǵa jetedi. Qazaqstannyń alty aımaǵy - Almaty, Astana, Qaraǵandy, Shymkent, Aqtóbe jáne Semeı qalalarynda stomatologtar men otolarıngologtardy oqytý mamandardyń onkoqaýipsiz bolýlaryna múmkindik beredi. Ári qaýipti belgiler anyqtalǵan jaǵdaıda jedel zertteý júrgizip, ýaqytynda dıagnoz qoıa alatyn bolady», - dedi D.Qaıdarova
Dárigerlerdi Qazaqstan men Reseıdiń jetekshi onkologtary oqytady. 17 men 23 qyrkúıek aralyǵynda kóshpeli qyzmet mamandary ár aýdannyń onkodıspanserinde halyqty tegin qaraý jumystaryn júrgizedi.
«Murynnyń bitelýi, daýystyń qarlyǵýy moıyn tusynda paıda bolatyn belgiler aýrýdyń bastapqy sımptomdary bolyp tabylady. Kóp adamdar buǵan mán bermeıdi. Kómeı isigi, aýyz qýysy, tamaq pen muryn máselelerimen stamotolog pen Lorga jolyǵady. Al bul mamandardyń bir degennen osyǵan nazar aýdarýy mańyzdy», - dedi Rostovskıı onkologııalyq ınstıtýtynyń bas jáne moıyn isigi bóliminiń basqarýshysy Marına Engıbarıan.
Onkoınstıtýttyń málimetinshe, ótken jyly dıagnostıkanyń erte kezeńi tek tórt qala boıynsha (Astana, Almaty, Semeı jáne Shymkent) ótkizilgen. 800-den asa patsıent tekserilip, onyń 123-de bas jáne moıyn jáne bas isigi bar dep boljanǵan. 29-ynda qaterli isik anyqtalǵan.
