Stokgolmde XVI–XVII ǵasyrlardaǵy keme sý betine shyqty

ASTANA. KAZINFORM — Baltyq teńizindegi sý deńgeıiniń ádetten tys tómendeýine baılanysty Stokgolm qalasynyń ortalyǵyndaǵy Kastelholmen mańynan XVI ǵasyrdyń sońy — XVII ǵasyrdyń basyna jatatyn áskerı keme kórinip qaldy, dep habarlaıdy AZERTADJ.

Qazirgi tańda Baltyq teńizindegi sý deńgeıi qalypty kórsetkishten shamamen 60 santımetrge tómen.

Keme apattary mýzeıiniń teńiz arheologi Iım Hanssonnyń aıtýynsha, uzyndyǵy 40 metrge jýyq bul keme, boljam boıynsha, nıderlandtyq úlgide jasalǵan.

— Buǵan deıin bul dat kemesi Grå Ulv bolýy múmkin degen boljam aıtylǵan edi. Ol XVII ǵasyrdyń ortasynda Shvetsııa tarapynan qolǵa túsken. Alaıda qazir biz bul kemeniń Grå Ulv emes ekenine derlik senimdimiz. Aldaǵy ýaqytta qosymsha zertteýler júrgizip, onyń naqty kimge tıesili bolǵanyn anyqtaǵymyz keledi, — dedi arheolog.

Belgili bolǵandaı, keme apat saldarynan emes, ádeıi sýǵa batyrylǵan. Atalǵan aýmaqta osyndaı 15 keme bar. XVII ǵasyrda olar 1640 jyldary salynǵan Sheppsholmensbrýn atty alǵashqy aǵash jyljymaly kópirdiń irgetasyn quraǵan. Zertteýshilerdiń pikirinshe, bul kemeler Shvetsııa flotynyń eskirgen kemeleri bolyp, qurylysqa qaıta paıdalanylǵan.

— Kemelerdi jóndeý tıimsiz bolǵan kezde flot olardy qaıta qoldanyp, sýǵa batyrǵan. Jańa aǵashtyń ornyna eski keme qaldyqtaryn paıdalaný — óte tańǵalarlyq qubylys, — deıdi I. Hansson.

Kemeniń korpýsy jaqsy saqtalǵan. Sý astynan zeńbirek ıadrolary, keramıka buıymdary men as úıge arnalǵan zattar tabylǵan. Arheologtiń aıtýynsha, bul Stokgolm qalasynyń dál ortasynda sýdyń astynda qanshalyqty baı ári áli tolyq zerttelmegen mádenı mura jatqanyn aıqyn kórsetedi.

Budan buryn Shvetsııada Karl XII korolge tıesili buryn belgisiz bolǵan joryq kitaby tabylǵanyn jazǵan bolatynbyz.