Stokgolmde Eýropa qazaqtarynyń bıznes-forýmy ótti
21 qazan kúni Stokgolmde Shvetsııa, Danııa, Norvegııa jáne Fınlıandııada turatyn otandastardyń bıznes-forýmy boldy. Forým – Qazaqstannyń Tuńǵysh Prezıdenti – Elbasy Nursultan Nazarbaevtyń bastamasymen bekitilgen «Otandastar Qory» KEAQ jáne Dúnıejúzi qazaqtary qaýymdastyǵynyń Soltústik Eýropada turatyn qazaqtarmen baılanysty nyǵaıtý baǵdarlamasynyń bir bóligi.
Oǵan qazaq dıasporalarynyń lıderleri, belsendileri, Qazaqstannyń Shvetsııadaǵy elshisi Qaırat Ábdirahmanov, Dúnıejúzi qazaqtary qaýymdastyǵy tóraǵasynyń orynbasary Arǵyn Ospanov, «Otandastar Qorynyń» jaýapty qyzmetkerleri, Shvetsııanyń Qazaqstandaǵy tuńǵysh elshisi Manne Vengborg, Qazaqstannyń Danııa, Fınlıandııa jáne Shvetsııadaǵy qurmetti konsýldary, Soltústik Eýropa elderindegi kompanııalarda jumys isteıtin qazaqtar, Túrkistan, Qaraǵandy oblystarynyń jún óńdeý, aýyl sharýashyly, agrotýrızm sııaqty salalardaǵy bıznesmenderi qatysty.
Qaýymdastyq pen Qor ókilderi búkil álemde «Qazaq úıi» Qazaq mádenı-iskerlik úıiniń quramyna kiretin mádenı ortalyqtar men iskerlik úıleriniń jelisin qurý josparlaryn bólisti.
Bıznes-forýmǵa qatysýshylar shaǵyn, orta jáne iri bıznestegi bastamalardy yntalandyrý, ózara yqpaldastyq tetikteri, startaptardy damytý máselelerin talqylady. Qatysýshylarǵa Qazaqstan óńirlerinde bıznes ashyp, damytýǵa qolaıly ınvestıtsııalyq áleýet tanystyryldy. Kezdesýde qalpyna keletin energııa, aqparat tehnologııalary, qurylys materıaldary, shıkizat óńdeý, munaı hımııasy, taý-ken ónerkásibi, kólik jáne logıstıka, aýyl sharýashylyǵy, bilim-ǵylym, sonyń ishinde túrkologııa, týrızm salalaryndaǵy ózekti jobalar aıqyndaldy.
Sonymen qatar Qor ókilderi barsha qazaq dıasporasymen tyǵyz baılanys ornatýǵa ázir ekenin bildirdi. Ol úshin otandastar máselelerine jaýap beretin Biryńǵaı baılanys ortalyǵy ashylǵan. Shvetsııadaǵy bıznes-forým bıyl ótkizilgen altynshy forým boldy. Buǵan deıingisi 20 qyrkúıekte Londonda ótken.
Sharada Qazaqstan Jastar qaýymdastyǵynyń tóraǵasy Aıdana Bekbergen kóptiń kózinshe elektrondyq formattaǵy ýaqyt kapsýlasyn bekitti. Jas otandastarǵa úndeý joldanǵan kapsýla 2025 jyly ashylady.
Qazaqstan delegatsııasy quramynda barǵan kásipkerlerdiń usynystary da qatysýshylardy qyzyqtyrdy. «Shymkent Kashemır» jún óńdeý fabrıkasynyń basshysy Shaǵanbek Qanjarbaıuly ónimin skandınav elderine satý nıetin bildirdi. «Toksumak» eko-agro-kentiniń avtory Oljas Omarov turǵyndardyń áleýmettik ál-aýqatyn nyǵaıtatyn ári etnıkalyq qazaqtardy Qazaqstanǵa tartýǵa múmkindik beretin jobalardy damytýǵa ınvestıtsııa tartý týraly usynystaryn aıtty.
Avtor: Ilıas Omarov
