Stıven Sıgal Astanada aıkıdodan sheberlik saǵattaryn ótkizdi (FOTO, VIDEO)
ASTANA. QazAqparat - Búgin Astanadaǵy Oqýshylar saraıynda tanymal Gollıvýd akteri, rejısser jáne prodıýser Stıven Sıgal balalarǵa arnap aıkıdodan sheberlik saǵattaryn ótkizdi.
Stıven Sıgal Astana kúni qarsańynda ótkiziletin Urys óneriniń I halyqaralyq festıvaline kelgen bolatyn.
Elorda ákimi Ádilbek Jaqsybekov Astanaǵa osymen birneshe márte kelip otyrǵan qadirli meımandy kútip alyp, Qazaqstannyń bas qalasyna qyzyǵýshylyq tanytyp otyrǵanyna alǵys aıtty, sonymen qatar qalanyń sońǵy jyldary oryn alǵan jańa ózgeristermen tanystyrdy. Keıin olar sheberlik saǵattary ótýi tıis Oqýshylar saraıyna bettedi. «Men búgin sizderdi osynda kórgenime qýanyshtymyn. Sizderdiń aldaryńyzda óz ónerimdi, bilgenimdi kórsetý men úshin úlken abyroı. Joǵary iltıpat kórsetip otyrǵan qala ákimi Ádilbek Jaqsybekovke alǵysym sheksiz. Balalar - bizdiń bolashaǵymyz. Búgin istep jatqan isterimizdiń barlyǵy olardyń jaqsy tárbıe men bilim alýlaryna arnalady», - dedi S.Sıgal. Sheberlik synypqa Aıkıdo federatsııasynyń sportshylary men Oqýshylar saraıynyń tálimgerleri, jalpy sany 70-ke tarta adam qatysty.
