Stıngtiń kontsertine satylǵan bıletter 7 shilde kúni Almaty, Astana jáne Qaraǵandy qalalarynda qaıtaryla bastaıdy
ASTANA. 3 shilde. QazAqparat /Jasulan Amanbaıuly/ - Stıngtiń kontsertine satylǵan bıletter 7 shilde kúni Almaty, Astana jáne Qaraǵandy qalalarynda qaıtaryla bastaıdy. Bul týraly búgin Astanada ótken baspasóz máslıhatynda Qala kúni merekesin uıymdastyrý komıteti shtabynyń medıa-top jetekshisi Janar Kolbachaeva málim etti.
Onyń aıtýynsha, Astanada 4 shilde kúni qala kúnine oraı ótkizilmek bolǵan Stıngtiń kontserti ártistiń gastroline jaýapty máskeýlik «STCS management» kompanııasynda bolǵan uıymdastyrý-tehnıkalyq aqaý sebepterine baılanysty kontsert ótkizý múmkin emes bolyp otyr. Kelisimshart boıynsha, kontsert uıymdastyrýǵa ketken barlyq shyǵyndy atalmysh kompanııa qaıtaratyn bolady. Sebebi, J. Kolbachaevanyń sózine qaraǵanda, «qazaqstandyq tarap Stıngtiń tehnıkalyq jáne turmystyq talabyn 100 paıyz oryndap shyqqan».
Onyń atap ótkenindeı, Stıngtiń kontsertine bılet satyp alǵan árbir kórermenderge bılet quny tolyq qaıtarylyp beriledi. «Bıletter 7 shilde kúni qaıtaryla bastaıdy. Bul shara barlyq bıletter qaıtarylmaıynsha úzilmeı júrgiziledi», - deıdi ol.
Uıymdastyrýshylardyń málimetteri boıynsha, 4 shilde kúni «Saryarqa» velotreginde ótýi tıis bolǵan kontsert bıletteriniń 70 paıyzǵa jýyǵy satylyp úlgergen.
Tolyq málimetti astana2011.kz saıtynan bilýge bolady.
