Steppe Games: mobıldi oıyn arqyly qazaq tilin zamanaýı ári qyzyqty formatta úırenýge bolady
ASTANA. KAZINFORM — Elordada balalarǵa arnalǵan alǵashqy qazaq tildi mobıldi oıyn — Steppe Games tanystyryldy. Oıyn Ǵylym jáne joǵary bilim mınıstrligi Til saıasaty komıtetiniń tapsyrysy boıynsha ázirlengen.
Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy basqarma tóraǵasynyń mindetin atqarýshy Maqpal Jumabaı oıynnyń mazmunyn tanystyrdy.
— Búginde álemde 2,1 mlrd adam smartfon arqyly oıyn oınaıdy, olardyń árbir tórtinshisi — bala. Eger biz balalarmen til tabysqyńyz kelse, dál osy tsıfrlyq ortada damýymyz qajet. Steppe Games — qazaq tilin úıretýdi oıyn arqyly júzege asyratyn alǵashqy oqytý formatyndaǵy joba. Munda ulttyq taǵamdar, oıyndar, tarıhı eskertkishter men salt-dástúr elementteri qamtylǵan. Búginde Qazaqstan qazaq tilinde oılana alatyn, mátin qurastyra alatyn jáne túrli baǵdarlamalardy oryndaı alatyn bilim modelin ázirlegen álemdegi alǵashqy 15 eldiń ishine endi. Bul biz úshin aıtýly jetistik, — dedi ol.
Maqpal Jumabaıdyń aıtýynsha, jobany ázirleýge shamamen eki jylǵa jýyq ýaqyt ketken.
— Bizdiń ereksheligimiz — oıyndy tek IT mamandar emes, lıngvıstermen birlesip jasadyq. Steppe Games — tek til úıretý quraly emes, dúnıetanymdy, ulttyq qundylyqty tanytatyn joba. Balalar oınap otyryp, qazaq tilindegi A1–A2 deńgeıindegi sózdik qoryn tolyqtyrady, — deıdi.
Balalar men jasóspirimderge qazaq tilin zamanaýı ári qyzyqty formatta úıretýdi maqsat etetin joba keıipkerleri — Arman men Aısha, al olardyń serigi — qazaqy tazy. Oıyn kartasy Qazaqstannyń naqty geografııalyq beınesine negizdelgen. Ázirge Astana men Almaty qalalary alynǵan. Aldaǵy ýaqytta basqa da aımaqtar qosylmaq.
Oıyn Astanadaǵy tarıhı Bozoq qalasynda ótedi. Asyq atý, sadaq atý, láńgi tebý, teńge ilý sııaqty ulttyq oıyndar oınalady. Al Almaty kezeńinde oıynshy ulttyq murajaılar men mádenı nysandardy aralaıdy.
— Búginde álemdegi eń qyzý báseke — kontent úshin báseke. Netflix ótken jyly 17 mlrd dollar jumsaǵan. Bul baǵytta bizdiń jastar jańa mazmun óndirýge qabiletti bolýy kerek. Sol úshin osyndaı jobalardy qoldaımyz. Steppe Games — jastarymyzdyń jańa múmkindikterin kórsetetin erekshe bastama, — dedi Ǵylym jáne joǵary bilim mınıstri Saıasat Nurbek.
Qazaqstannyń qurmetti jýrnalısi, Senat depýtaty Nurtóre Júsip te tsıfrlyq dáýirdegi bilim men oıyn mazmuny mańyzdy bolýy kerektigin aıtty.
— Búgingi qazaq balasyna oıly oıyn qajet. Qııaldy ushtap, elin, jerin, tilin súıýge jeteleıtin osyndaı jobalar kerek. Steppe Games — sol suranysty óteıtin bastama. Mundaı oıyndar arqyly urpaq rýhanı turǵyda damyp, mádenıetke, dástúrge berik bolady, — dedi.
Qazaqstannyń memleket jáne qoǵam qaıratkeri, Senat depýtaty Darhan Qydyráli jobany ulttyq brendti tanytýdyń zamanaýı tásili dep atady.
— Bul — tehnologııa men dástúrdiń úılesken úlgisi. Qazaq tilin jasandy ıntellekt arqyly damytý jónindegi tapsyrma osylaı tez oryndalyp jatqany qýantady, — dedi.
Al «Qazaq tili» qoǵamynyń prezıdenti Raýan Kenjehanuly kez kelgen oıyn — jaı ermek emes ekenin atap ótti.
— Onyń artynda sol ulttyń rýhy men tili turady. Sondyqtan bul — til janashyrlary úshin zor qýanysh, — dedi ol.
Qazaqy tazy sport federatsııasynyń quryltaıshysy Nurqoja Baýyrjanuly balalar Steppe Games ambassadory — tazy ıtterin ala kelipti. Balalar asyq oınap, arnaıy daıyndalǵan torttan dám tatty.
Steppe Games mobıldi oıynyn App Store jáne Play Market platformalarynan júkteýge bolady.
«Til-Qazyna» ulttyq ǵylymı-praktıkalyq ortalyǵy budan bólek taǵy eki iri jobany tanystyrdy:
• QazGramma — qazaq tilindegi mátinderdiń orfografııalyq jáne stılıstıkalyq qatelerin túzetetin ıntellektýaldy júıe;
• Ulttyq Qazyna AI kómekshisi — eresekterge qazaq tilin jasandy ıntellekt arqyly úıretetin joba.
Sondaı-aq QR-kod arqyly qazaq tiline sınhrondy aýdarma jasap otyratyn jańa saıt tanystyryldy. Munda jasandy ıntellekt negizinde sımvoldyq túrde aýdarma jasalady.
Kamıla Múlik