Stepnogorskiniń jylý jelilerin rekonstrýktsııalaýǵa 2,7 mlrd teńge bólindi
ASTANA. KAZINFORM — Memleket basshysynyń tapsyrmalaryn oryndaý sheńberinde energetıkalyq ınfraqurylymdy júıeli jańǵyrtý júrgizilip jatyr. Úkimet qaýlysymen Aqmola oblysy Stepnogorsk qalasynyń jylý jelilerin rekonstrýktsııalaý úshin rezervten shamamen 2,7 mlrd teńge bólindi.
Qujatqa sáıkes, Úkimet rezervinen bólingen qarajat jedel rekonstrýktsııalaýdy qajet etetin dıametri 530 mm bolatyn 6,5 shaqyrym jylý jelilerin jóndeýge bólingen.
Stepnogorsk qalasynyń jylý jelileriniń uzyndyǵy 123,8 shaqyrym. Magıstraldyq jylý jelisi 1968 jyly salynǵan jáne tozý deńgeıi 84,4%.
Apattyq jáne jylý berý kezeńinde tótenshe jaǵdaıdyń týyndaý qaýpin boldyrmaý maqsatynda Úkimet rezervinen bólingen qarajatqa jedel rekonstrýktsııalaýdy qajet etetin dıametri 530 mm bolatyn 6,5 shaqyrym jylý jelilerin jóndeý jumystary júrgizilip jatyr.
Keleshekte «Energetıkalyq jáne kommýnaldyq sektorlardy jańǵyrtý» ulttyq jobasy sheńberinde 2025–2026 jyldary 5,8 mlrd teńge somasyna uzyndyǵy 9,5 shaqyrym, dıametri 820 mm bolatyn magıstraldyq jylý jelilerin rekonstrýktsııalaý jónindegi jobany júzege asyrý josparlanyp otyr.
Bul jumysty júrgizý aldaǵy jylytý maýsymyna ýaqtyly daıyndalýǵa, kúrdeli apattardyń aldyn alyp, úılerge jylýdyń úzdiksiz berilýin qamtamasyz etýge múmkindik beredi.
Esterińizge sala keteıik, Stepnogorsk qalasynyń halyq sany shamamen 46 myń adam. Qaladaǵy kópqabatty úıler – 316, áleýmettik nysandar – 65, basqa tutynýshylar – 342. Barlyq turǵyn úı men nysan ortalyqtandyrylǵan jylytýdy tutynady, jalpy maksımaldy jylý júktemesi – 175 Gkal.
Aıta ketelik eldiń 2025-2030 jyldarǵa arnalǵan óńirlik damý tujyrymdamasy ázirlenip, múddeli memlekettik organdarmen kelisilip jatqany týraly jazǵan edik.