Stepnogorskide bir táýliktiń ishinde altyn rýdasyn urlaǵan 63 adam ustaldy
KÓKShETAÝ. QazAqparat - Aqmola oblysynyń Stepnogorsk qalasynda bir táýliktiń ishinde quramynda altyny bar rýdany urlaǵan 63 adam qolǵa tústi, dep habarlaıdy «QazAqparat» HAA tilshisi ІІD baspasóz qyzmetine silteme jasap.
Polıtseılerdiń málimeti boıynsha, qazirgi tańda oblys aýmaǵynda quramynda altyny bar rýdany urlaýdy aldyn alý baǵytynda aýqymdy jumystar júrgizilýde.
Jyl basynan beri Stepnogorsk qalasyna qarasty Aqsý jáne Bestóbe kentindegi polıtsııa bólimshesine quramynda altyny bar rýdany urlaýmen aınalysqan 800 adam jetkizilgen. Altyn rýdasy úshin Stepnogorsk qalasyna Aqmola oblysy aýmaǵynan ǵana emes, kórshi oblystardan da adamdar keledi.
Sol sebepti, jol-patrýldik polıtsııa qyzmetkerlerimen 100 avtokólik tekserildi. Qala aýmaǵynda rýda óńdeıtin 2 shaǵyn tseh, quramynda 7 tonnadan astam altyny bar kvarts rýdasy tárkilendi. Oǵan qosa, Aqsý jáne Bestóbe kentindegi shahtalarǵa zańsyz túsetin 5 tesik jol anyqtaldy.
Atalǵan oqıǵalarǵa baılanysty QR QK 12 qylmystyq is qozǵalsa, onyń 8- i 334 bap (zańsyz jer qoınaýyn paıdalaný) boıynsha.
«...Zańsyz altyn rýdasyn urlaýshylar arnaıy kıimi men qural-jabdyqtarynyń bolmaýy jáne qaýipsizdik sharalarynyń saqtalmaýy saldarynan alǵan dene jaraqatynan ajal qushýy múmkin...», deıdi polıtseıler.
