Stepnogorskide polıtseıge qol kótergen áıelge qatysty tergeý bastaldy

Oqıǵa 15 tamyzda saǵat 00:30 shamasynda bolǵan. Polıtsııanyń kezekshi bólimine turǵyn úı páterleriniń birinde tártiptiń buzylǵany týraly habarlama túsken. Oqıǵa ornyna avtopatrýl jiberilgen.

Polıtsııa qyzmetkerleri páterden mýzyka dybysy qatty shyqqanyn anyqtaǵan. Esikti 40 jastaǵy áıel mas kúıinde ashqan. Tártip saqshylary odan tynyshtyqty saqtaýdy jáne medıtsınalyq kýálandyrýdan ótýdi talap etken. Alaıda áıel polıtsııa qyzmetkerlerine agressıvti jaýap berip, balaǵat sózder aıtqan jáne olardyń zańdy talaptaryn oryndaýdan bas tartqan.

Janjal barysynda áıel polıtsııa qyzmetkerin ıterip, keıin kireberiske júgirip shyqqan. Sol jerde tártip saqshysyna qol jumsap, onyń beti men moınyna syzat túsirgen. Oqıǵany basqa patrýl qyzmetkeri beınekameraǵa túsirip alǵan.

— Polıtsııa azamattardy qoǵamdyq tártipti saqtaýǵa, quqyq qorǵaý organdary qyzmetkerleriniń zańdy talaptaryna qurmetpen qaraýǵa jáne agressıvti minez-qulyq pen dene kúshin qoldanýǵa jol bermeýge shaqyrady, — dep habarlady polıtsııa.

Atalǵan fakti boıynsha sotqa deıingi tergeý bastaldy. Qazir oqıǵanyń barlyq mán-jaıy anyqtalyp jatyr. Tergeý aıasynda tıisti protsessýaldyq sharalar qabyldanady.

Eske salaıyq, buǵan deıin Óskemende polıtseıge shabýyl jasap, oq atqan eki er adam ustalǵanyn habarlaǵanbyz.