Stepnogorskide 1,1 mlrd teńgelik satyp alýlar tekserilip, 386 mln teńge qysqartyldy
KÓKShETAÝ. KAZINFORM – Stepnogorsk qalasynyń prokýratýrasy bıýdjet qarajatyn paıdalaný barysynda jiberilgen zań buzýshylyqtardy anyqtap, júzdegen mıllıon teńgeniń negizsiz jumsalýyna tosqaýyl qoıdy.
Prokýratýra málimetinshe, qala ákimdigi qysqy jáne jazǵy maýsymdarda qalany kútip-ustaý jumystaryna arnalǵan memlekettik satyp alýlardy josparlaý kezinde bıýdjet zańnamasynyń talaptaryn saqtamaǵan.
Tekserý barysynda smetalyq qunnyń negizsiz ulǵaıtylǵany, artyq ári ekonomıkalyq turǵydan negizdelmegen jumys kólemderiniń engizilgeni jáne básekelestik ortany shekteıtin talaptardyń belgilengeni anyqtalǵan.
– Qadaǵalaý sharalarynyń nátıjesinde jalpy somasy 1,1 mlrd teńgeni quraıtyn 9 memlekettik satyp alý rásiminiń kúshi joıyldy, – dep habarlady Aqmola oblysynyń prokýratýrasy.
Prokýrorlyq aralasýdan keıin jobalardyń smetalyq quny qaıta qaralyp, negizsiz josparlanǵan shyǵyndar qysqartylǵan.
– Smetalyq qun tómendetilip, bıýdjetten negizsiz jumsalýy múmkin 386 mln teńge kólemindegi shyǵyndar alyp tastaldy. Bul memlekettik qarajatty únemdeýge múmkindik berdi, – delingen habarlamada.
Anyqtalǵan zań buzýshylyqtarǵa baılanysty jaýapty tulǵalar tártiptik jaýapkershilikke tartyldy. Jiberilgen zań buzýshylyqtar úshin qala ákiminiń orynbasary men memlekettik aktıvter bóliminiń basshysy tártiptik jaýaptylyqqa tartyldy.
Qadaǵalaý organy bıýdjet qarajatynyń maqsatty ári tıimdi jumsalýyn baqylaý jumystary turaqty túrde jalǵasatynyn atap ótti.
Aıta keteıik, Aqtaýda 600 mln teńgege jýyq zańsyz satyp alýdyń joly kesildi.
