Stepnogorsk polıgonyndaǵy órt: Jedel shtab quryldy
STEPNOGORSK. QazAqparat - Stepnogorsk qalasynyń qatty turmystyq qaldyqtar polıgonyndaǵy órt sóndirilýde, dep habarlaıdy QazAqparat tilshisi.
Qala ákimi Erkebulan Baıahmetovtiń aıtýynsha, órt mamyrdyń 1-de tutanǵan. Órtti sóndirýge jáne polıgon aýmaǵynan odan ári taralýyna jol bermeý sharalaryna polıgonǵa qyzmet kórsetýshi «Qurylys MTK» JShS men Aqmola oblysynyń TJD mamandandyrylǵan órt sóndirý bólimi jumyldyryldy. Qolǵa alynǵan sharalardyń nátıjesinde tilsiz jaý kelesi kúni aýyzdyqtaldy.
Alaıda, qala ákimdiginiń málimeti boıynsha, turmystyq qaldyqtar polıgonyndaǵy hımııalyq protsester jáne jańadan jetkizilgen qoqystardyń saldarynan órt qaıta tutanǵan.
Órtti aýyzdyqtaý maqsatynda aımaq basshysy Ermek Marjyqpaevtyń tapsyrmasymen jedel shtab qurylyp, 32 arnaıy tehnıka jumyldyryldy.
«Búgingi tańda tútin shyqqan aýmaqty 3000 sharshy metrden 700-ge deıin azaıtý múmkindigi týdy. Órttiń negizgi oshaǵyn túski saǵat 14:00 deıin aýyzdyqtaý josparda bar. Sondaı-aq, aldaǵy ýaqytta ár tusta byqsyp jatqan ózge jerlerde baqylaýǵa alynyp, sý shashylatyn bolady», - dep jazdy qala ákimi Erkebulan Baıahmetov áleýmettik jelidegi paraqshasynda.
Eske sala keteıik, osyǵan deıin habarlaǵanymyzdaı, Stepnogorsk qalasynyń ákimdigi shahardyń mańyndaǵy qatty turmystyq qaldyqtar polıgonynda tutanǵan órtke shaǵymdanǵan bolatyn.
