Stepnogorsk qalasynda sýmen jabdyqtaý jelileri jańartyldy

KÓKShETAÝ. QazAqparat - Aqmola oblysynyń Stepnogorsk qalasynda 2015-2019 jyldarǵa arnalǵan «Nurly jer» baǵdarlamasy aıasynda sýmen jabdyqtaý júıesin jańǵyrtý jumystary júrgizilýde, dep habaralaıdy QazAqparat tilshisi.

Qala ákimdiginiń málimeti boıynsha, kúrdeli jóndeý jumystary shahardyń birneshe shaǵyn aýdandary men Zavodskoı jáne Aqsý kentterinde qolǵa alynǵan.

Zavodskoı jáne Aqsý aýyldaryndaǵy sýmen jabdyqtaý jelilerin qaıta jańǵyrtýdy merdiger uıym «BaLı-Stroı» JShS júzege asyrýda. Munda 93,5 shaqyrymǵa jýyq jeliler jóndelmek. Osy kúni bul qubyrlardyń 90 paıyzy tozǵan. Jobanyń quny 1,5 mıllıard teńgeden asady.

Merdiger kompanııanyń proraby Igor Karpenkonyń aıtýynsha, búgingi kúni negizgi jumystar aıaqtalǵan. Jaqyn arada kóshedegi qudyqtardan turǵyn úılerge deıin sý taratqysh qubyrlardy tartý josparlanǵan.

Eldi mekenderde bul jumystardyń 68 paıyzy atqarylǵan. Osy oraıda, qala ákimi Ánýar Kúmpekeev merdiger jumysynyń qarqynyn arttyrý úshin qosymsha toptar engizip otyr.

Qala ishindegi móltek aýdandarǵa (4, 6 jáne 7) kelsek, munda jelilerdiń 24 shaqyrymnan astamy qalpyna keltirildi. Búgingi kúni jumystyń 78 paıyzy aıaqtalǵan.

«Stepnogorsk sý arnasy» AQ-nyń dırektory Alekseı Getmanov, óz kezeginde sýmen qamtamasyz etý júıelerin jańǵyrtý jumystary kestege saı júrgizilip jatqandyǵyn jáne ony jyl sońyna deıin aıaqtalatyndyǵyn jetkizdi.

«Bul bastamadar qala men eldi mekenderdi taza aýyz sýmen jabdyqtaýǵa jáne sanıtarlyq-aǵymdy júıelerin jańǵyrtý múmkindik beredi», - deıdi Alekseı Getmanov.