Stepnogorlik qarııanyń 1,5 mıllıon teńgeden astam aqshasyn jymqyrǵan kúdiktiler ustaldy
KÓKShETAÝ. QazAqparat - Aqmola oblysynda 93 jastaǵy qarııanyń 1,5 mıllıon teńgeden astam aqshasyn jymqyrǵan kúdiktiler qolǵa tústi, dep habarlaıdy «QazAqparat» HAA tilshisi oblystyq ІІD baspasóz qyzmetine silteme jasap.
Polıtseılerdiń málimeti boıynsha, 2017 jyldyń 6 qańtarynda Stepnogor qalalyq ІІB-ne 93 jastaǵy jergilikti turǵyn aryzdanǵan. Zardap shegýshiniń sózine qaraǵanda, sol kúni saǵat 11.00 kezinde qarııanyń páterine belgisiz eki jigit kelip, esigin qaqqan. Ózderin qalalyq sý arnasynyń qyzmetkerleri dep tanystyrǵan kúdiktiler erli zaıypty qarııalarǵa as bólmege sý tazalaǵysh qondyrǵy ornatý qajet dep sendirgen. Qos qarııanyń kúdiktilerdiń biriniń sońynan as bólmege ketken sátin paıdalanǵan ekinshi kúdikti jatyn bólmede saqtaýly turǵan 1 670 000 teńge aqshany qoldy qylǵan. Arada týra 2 saǵat ótken soń aqshasynyń urlanǵanyn baıqaǵan qarııa polıtsııanyń kómegine júgingen.
Sonymen qatar, qarııanyń aıtýynsha, osydan birer kún buryn onyń páterine belgisiz jas jigit kelip, qazirgi zamanǵy «massajer» satqan. Sol kezde kúdikti atalǵan zattyń qunyn tólerde qarııalardyń aqshany qaıdan alyp shyqqannyn baıqap qalǵan.
«Jedel izdestirý sharasy barysynda Stepnogor qalalyq ІІB krımınaldy polıtsııa bólimshesiniń qyzmetkerleri 28 jáne 29 jastaǵy kúdiktilerdi ustady.
Qazirgi kezde, kúdiktiler ýaqytsha ustaý oqshaýlaǵyshyna qamalyp, ústerinen QR QK 188-babynyń 3-bólimi boıynsha qylmystyq is qozǵaldy», - dep kórsetilgen habarlamada.
