Stepnogordyń kentinde qazandyq iske qosyldy
KÓKShETAÝ. QazAqparat - Stepnogor qalasynda qala ákimi Erkebulan Baıahmetovtiń halyqqa esep berý kezdesýi ótti. Oǵan Aqmola oblysynyń ákimi Málik Myrzalın qatysty, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
Jında Stepnogor qalasynyń ákimi 2018 jylǵy áleýmettik-ekonomıkalyq damýdyń negizgi kórsetkishteri men jumys nátıjeleri jáne 2019 jylǵa arnalǵan jumys josparlary men azamattardyń ózekti máselelerin sheshý týraly baıandap berdi.
Ótken jyly ónerkásip kásiporyndarymen 2017 jylǵy kórsetkishke qaraǵanda, 44 paıyz ósimimen 136 mıllıard teńge somasyna ónim óndirildi. Oblystyń ónerkásip óndirisindegi qalanyń úlesi 21 paıyzdy qurady. Oǵan Indýstrııalyq-ınnovatsııalyq damytýdyń memlekettik baǵdarlamasynyń aıasyndaǵy jobalardy iske asyrýdyń nátıjesinde qol jetkizildi.
Stepnogor óńiriniń ekonomıkasyn damytýǵa shamamen 22 mıllıard teńge qarjy jumsaldy, jeke ınvestıtsııalardyń úlesi 98 paıyzdy qurady.
Ekonomıkany ártaraptandyrý salasynyń biri retinde kásipkerlikti damytýdaǵy negizgi ındıkatorlardyń ósimi atap ótildi.
«Bıznestiń jol kartasy - 2020» baǵdarlamasy boıynsha 19 joba sýbsıdııalanýda, 550 adam qarjylyq emes qoldaý aldy. Nátıjeli jumyspen qamtýdy jáne jappaı kásipkerlikti damytý baǵdarlamasynyń aıasynda óńir turǵyndaryna shaǵyn kredıtter, jańa bıznes-ıdeıalardy iske asyrýǵa memlekettik granttar usynyldy. Atap aıtqanda, Stepnogor qalasynda «Dáriger plıýs», «Gamma Tsentr» kóp fýnktsıonaldy medıtsınalyq kabınetter, «Food Time Kids» balalardyń oıyn kafesi, «Svetofor» tómengi baǵa dúkeni, avtomobılderge qyzmet kórsetý kesheni, zamanaýı formattaǵy 3 dúken; Bestóbe kentinde «Altyn Uıa» meıramhanasy ashyldy.
Aǵymdaǵy jyly «Damý» qorynyń qarajatymen birlesip qarjylandyrý arqyly jergilikti bıýdjet esebinen tamaq ónimderiniń óndirisi, qoqysty suryptaý men óńdeý, balalar úshin demalýyn uıymdastyrý boıynsha kásipkerlerdiń jobalaryna qoldaý kórsetý josparlanýda.
Stepnogor qalasynda kóp páterli turǵyn úılerdi ortalyqtandyrylǵan gazben jabdyqtaýdy qalpyna keltirý bastaldy. Qalanyń turǵyn úı qoryn odan ári ulǵaıtý maqsatynda, 143 páterli turǵyn úı qalpyna keltirildi. Sondaı-aq, taǵy bir kóp páterli turǵyn úıdi rekonstrýktsııalaý josparlanýda.
«Nurly jol» baǵdarlamasynyń aıasynda Shańtóbe kentinde qazandyq iske qosyldy, Aqsý jáne Zavodskoı kentterinde sýmen jabdyqtaý men sý burý júıelerin rekonstrýktsııalaý júrgizilýde, sý tazalaý ımarattaryn rekonstrýktsııalaý jobasyn iske asyrý bastaldy. Qalanyń 38 myń sharshy metr kvartalishilik joldar jóndeldi, Stepnogor-Ónerkásip aımaǵy avtomobıl jolynyń ýchaskesine ortasha jóndeý júrgizildi, Aqsý-Bestóbe-Izobılnoe jolyn jóndeý bastaldy.
Eńbek naryǵynda 732 jańa turaqty jumys orny ashyldy, 2104 jumyssyz azamat jumysqa ornalastyryldy.
2016 jyldan beri 3 jastan 6 jasqa deıingi balalardy mektepke deıingi tárbıeleýmen júz paıyzdyq qamtý saqtalýda, bóbekjaı toptaryn ashý esebinen 1 jastan 6 jasqa deıingi balalardy qamtý kórsetkishi 68,4 paıyzdan 82,9 paıyzǵa deıin artty. Sonymen qatar, aǵymdaǵy jyly Bestóbe kentinde 150 orynǵa jeke menshik balabaqsha jumysyn bastaıdy.
Kezdesý «suraq-jaýap» formatynda jalǵasty. Qala turǵyndary men jaqyn ornalasqan kentterdiń turǵyndaryn densaýlyq saqtaý, turǵyn úı-kommýnaldyq sharýashylyq, abattandyrý jáne jol jóndeý máseleleri qyzyqtyrdy.
Kezdesýdiń qorytyndysyn shyǵara kele, Málik Myrzalın Stepnogor qalasynyń ónerkásip óndirisiniń joǵarǵy úlesin atap ótti.
«Oblys ekonomıkasynda Stepnogor qalasy 11 paıyzyn quraıdy. Ol barsha jáne árbir turǵynnyń sińirgen eńbeginiń nátıjesi. Sizder qol jetkizgen jetistikte toqtap qalmaı, jyl saıyn jańa kásiporyndar ashylýda. Alaıda, atqarylǵan iske tsıfr turǵysynan qarap qoımaı, adamdardyń ómir súrý sapasyna nazar aýdarý qajet», - dep atap ótti oblys ákimi.
Óńir basshysy kásipkerlikti damytýdy jáne turǵyn úı qurylysynyń qarqynyn údetýdi tapsyrdy. Oblys ákimimen medıtsınalyq mekemelerdi jabdyqtarmen qamtamasyz etý, jol salý men jóndeý máseleleri jeke baqylaýyna alyndy.
