Stepnogordegi órtten 5 adam qutqarylyp, 15 adam evakýatsııalandy

KÓKShETAÝ. QazAqparat - Stepnogor qalasyndaǵy kóp qabatty turǵyn úıde bolǵan órtti sóndirý barysynda avtosaty kómegimen bes adam qutqarylyp, 15 adam evakýatsııalandy, dep habarlaıdy QazAqparat tilshisi Aqmola oblysy TJD baspasóz qyzmetine silteme jasap.

Vedomstvonyń málimetinshe, Stepnogor qalalyq órt sóndirý bólimine 9-shy shaǵyn aýdandaǵy 46-úıde páterdiń órtengeni týraly habar túsken.

«Órt altynshy qabattaǵy bir bólmeli páterden shyqty. Órtten kórshi páterlerdiń esikteri zaqymdaldy, órt aýmaǵy 30 sharshy metrdi sharpydy», - dep túsindirdi Stepnogor qalasynyń TJB bastyǵynyń mindetin atqarýshy Arman Shaıahmetov.

Avtosatynyń kómegimen bes adam qutqaryldy, baspaldaq marshy boıynsha 15 adam, onyń ishinde bir bala evakýatsııalandy. Qazir órttiń shyǵý sebebi anyqtalyp jatyr.

Páter ıesiniń aıtýynsha, órt balkonda turǵan kıimge túsken temeki tuqylynan tutanǵan. Aqmola turǵyndary búkil múlkinen aıyrylǵan otbasyǵa kómektesýdi bastap ketti.