Stepnogordegi mektep-ınternatynyń tárbıelenýshileri tómengi synyp oqýshylaryna álimjettik jasaǵan
STEPNOGOR. QazAqparat - Aqmola oblysynda Stepnogor sport ınternatynda oryn alǵan oqıǵa boıynsha qylmystyq is qozǵaldy, dep habarlaıdy QazAqparat tilshisi.
Bul týraly jaqynda Step News arnasynda Stepnogor qalasynyń sportta daryndy balalarǵa arnalǵan oblystyq mamandandyrylǵan mektep-ınternatynda álimjettik týraly túsirilgen vıdeo paıda boldy. Jazbadan joǵary synyp oqýshylarynyń ózderinen tómengi synyptaǵy oqýshylarǵa jábir kórsetkenin kórýge bolady.
Aqmola oblystyq polıtsııa departamenti baspasóz qyzmetiniń málimetinshe, Stepnogor mektep-ınternatynda dene jaraqatyn salý oqıǵasyna qatysty Qylmystyq kodekstiń 141-shi baby «balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý» jáne Qylmystyq kodekstiń 194-shi babynyń 2-shi bóligi «bopsalaý» boıynsha sotqa deıingi tergeý bastaldy.
«2021 jyldyń 21 qazanynda sporttaǵy daryndy balalarǵa arnalǵan oblystyq mamandandyrylǵan mektep-ınternatynyń tárbıelenýshileri, 8 - synyptyń kámeletke tolmaǵan úsh oqýshysy buryn jeke óshpendilik qarym - qatynas aıasynda 7-synyptyń eki oqýshysyna dene jaraqatyn salǵany jáne ony telefonǵa túsirgeni aldyn ala anyqtaldy», - dep túsindirdi vedomstvodan.
Vedomstvodan atap ótkendeı, qazirgi ýaqytta sot-medıtsınalyq saraptama taǵaıyndaldy, tergeý amaldary júrgizilýde.
Sonymen qatar, dene shynyqtyrý jáne sport basqarmasynyń baspasóz qyzmeti mektep-ınternat ákimshiligi tarapynan tártip buzýshylyq oqıǵasy boıynsha qyzmettik tergeý júrgizilgenin habarlady.
«Kináli oqýshy-sportshylar mektep-ınternattan shyǵaryldy. Osy oqıǵaǵa jol bergen qyzmetkerlerge mektep ákimshiligi ákimshilik jazalaý sharalaryn qoldandy. Barlyq materıaldardy zerdelegennen keıin Aqmola oblysynyń dene shynyqtyrý jáne sport basqarmasy tarapynan tekserý júrgiziletinin jáne kináliler QR qoldanystaǵy zańnamasyna sáıkes jaýapqa tartylatynyn qosymsha habarlaımyz», - dep túıindedi vedomstvodan.
