Stepnogorde «Hrýstalnyı kolos-2018» spartakıadasynyń alaýy jaǵyldy
KÓKShETAÝ. QazAqparat - Stepnogorsk qalasynda qysqy oblystyq «Hrýstalnyı kolos-2018» spartakıadasynyń alaýy jaǵyldy, dep habarlaıdy QazAqparat tilshisi.
Aqmola oblysy ishki saıasat basqarmasy baspasóz qyzmetiniń deregi boıynsha osymen 32-shi ret uıymdastyrylyp otyrǵan spartakıadanyń ashylý saltanatyna oblys ákiminiń orynbasary Aına Mysyrálimova qatysyp, quttyqtady. 
«Básekege oblystyń ár aýdanynan kelgen 700 sportshydan quralǵan 19 komanda qatysyp, shańǵy jarysy, dopty hokkeı jáne bıatlon tárizdi qysqy sport túrleri boıynsha synǵa túsýde», dep túsindirdi baspasóz qyzmetindegiler.
Sap túzegen komandalar aldynda bıatlonnan Qazaqstan Respýblıkasynyń sport sheberleri, QR birneshe dúrkin chempıondary Izabella Parmanova jáne Arına Krıýkova, Bógenbaı batyr atyndaǵy sportta daryndy balalarǵa arnalǵan oblystyq mektep-ınternatynyń tárbılenýshisi Aına Temirtasova, áıelder kúresi boıynsha halyqaralyq deńgeıdegi sport sheberi, jastar arasynda Azııa chempıony Nurgúl Nurǵalıeva spartakıada jalaýyn kóterse, dzıýdodan spor sheberine úmitker, QR chempıonatynyń qola júldegeri, fýtzaldan Stepnogor qalasy quramasynyń kapıtany, Aqmola oblysynyń birneshe dúrkin chempıony Davıd Kldıashvılı jarys alaýyn jaqty. Jarys jeńimpazdary 3-shi naýryz kúni anyqtalatyn bolady.
