Stepnogorde bank fılıalynyń dırektory men kassıri 255 mln teńgeni jymqyrǵan
KÓKShETAÝ. KAZINF0RM – Stepnogorde 255 mln teńgeni jymqyrǵan bank fılıalynyń dırektory men kassıri sottaldy. Olardyń árqaısysy 7 jylǵa bas bostandyǵynan aıyryldy.
Aqmola oblysy soty baspasóz qyzmetiniń málimetinshe, Stepnogor qalasyndaǵy ekinshi deńgeıdegi bank bólimshesiniń dırektory men kassıri sóz baılasyp, bank aqshasyn jymqyryp, asa iri mólsherde materıaldyq shyǵyn keltirgen.
«2022 jyldyń qarasha-jeltoqsan aılary ishinde kassır dırektordyń nusqaýy boıynsha 1 mln, 3 mln, 8 mln teńge aqsha somalaryn banktiń qoımasynan alyp, dırektorǵa turaqty túrde berip otyrǵan. Bank dırektory aqshaǵa arnalǵan paketter men sómkeni aldyn ala kassırge daıyndap, sodan keıin ony bank ǵımaratynan shyǵaryp otyrǵan. Tekserý aktisi kórsetkendeı, bank bólimshesinde jetispeýshilik somasy 255 mln astam teńge quraǵan», - dedi vedomstvodan.
Sottalýshylardyń kinási tekserý aktisimen, aýdıtorlyq eseppen, aqshanyń jetispeýi týraly saraptama qorytyndysymen, kýágerlerdiń aıǵaqtarymen, sottalýshylardyń ózderi moıyndaǵan aıǵaqtarymen, banktiń beınebaqylaý kameralarynan jazbalarmen jáne istiń basqa da materıaldarymen dáleldendi.
Osylaısha, bank dırektory men kassıri sóz baılasyp, qyzmettik babyn paıdalana otyryp, asa iri mólsherde aqsha jymqyrdy (QK-niń 189-baby 4-bóliginiń 2-bólimshesi).
«Jaza taǵaıyndaý kezinde sot, bank dırektorynyń óz kinásin moıyndaǵany, kassırdiń jasy men oń sıpattaǵy minezdemesin jeńildetetin jaǵdaılar dep jáne aýyrlatatyn jaǵdaılardyń bolmaýyn esepke aldy. Sot úkimimen árqaısysyna 7 jylǵa bas bostandyǵynan aıyrý jazasy taǵaıyndaldy. Sonymen qatar, sottalýshylar uıymdar men mekemelerde 5 jylǵa materıaldyq jaýapty laýazymdardy atqarý quqyǵynan aıyryldy. Keltirilgen zalaldy óndirip alý bóliginde jábirlenýshige sotqa azamattyq sot isin júrgizý tártibimen júginý quqyǵy túsindirildi», - dep tolyqtyrdy vedomstvodan.
Sot úkimi zańdy kúshine engen joq.
Qylmystyq quqyq buzýshylyqtardyń aldyn alý maqsatynda, úkimdi jarııalaý boıynsha sot otyrysyna bank fılıalynyń qyzmetkerleri shaqyryldy.
Eske salaıyq, Qosshyda salyq organynyń qyzmetkeri birneshe ret ınternet-alaıaqtyq jasaǵan.
