Stepnogorda polıtseı kóziniń kúıgenine qaramastan uryny ustap úlgerdi
KÓKShETAÝ. QazAqparat - Stepnogor qalalyq PB krımınaldyq polıtsııa bóliminiń qyzmetkeri kózine burysh spreıi shashyraǵanyna qaramastan urylardyń birin qylmys ústinde ustady, dep habarlaıdy QazAqparat tilshisi.
Aqmola oblystyq polıtsııa departamenti baspasóz qyzmetiniń málimetinshe, uryny qylmys ústinde ustaý kórshilerdiń qyraǵylyǵynyń arqasynda júzege asyryldy. Bul týraly mamyrdyń 28-inde Stepnogor qalalyq PB basqarmasynyń kezekshi bólimine habarlandy. Onda turǵyn úıdiń kire berisinde kúdikti adamdardyń júrgeni aıtylǵan.
«Oqıǵa ornyna jetken tártip saqshylaryn kórgen qylmystyq top músheleriniń biri polıtseıdiń betine burysh spreıin shashyp jiberdi. Alaıda, kóziniń kúıgenine qaramastan, polıtsııa qyzmetkeri jedel-tergeý toby kelgenge deıin bir qaskúnemdi ustady», - dedi vedomstvodan.
Kúdikti «páter urysy» retinde esepte turǵan Kókshetaý qalasynyń 37 jastaǵy turǵyny bolyp shyqty.
«Qaskúnemniń eki sybaılasy qashyp ketti. Qazirgi ýaqytta olardyń ornalasqan jeri anyqtalýda. Bul joly kúdiktiler kóp qabatty turǵyn úıdegi páterlerdiń birinen altyn buıymdar men 300 myń teńge kóleminde aqsha urlamaq bolǵan», - dep tolyqtyrdy vedomstvodan.
