Stepnogorda qalaishilik joldardyń jaı-kúıi talqylandy
ASTANA. 1 sáýir. QazAqparat - Internettegi áleýmettik jelilerde 31 naýryz kúni saǵat 12-00-de Stepnogor qalasynyń áýesqoı avtomobılshileri qalaishilik jolardyń jaı-kúıine bıliktiń nazaryn aýdarý úshin jıyn ótkizetindigi jarııalanǵan bolatyn.
Aqmola oblysy ákimdigi baspasóz qyzmetiniń habarlaýynsha, keshe atalǵan ýaqytta qala basshysy Andreı Nıkıshev jınalǵandardyń aldyna shyǵyp, kóterilgen máseleni «Gornıak» mádenıet úıinde talqylaýǵa shaqyrdy. Sharaǵa 300-ge jýyq adam, onyń ishinde respýblıkalyq «OKO», «Lıter», «Megapolıs» gazetteriniń, «KTK» telearnasynyń ókilderi, qalalyq «Prestıj», «Novaıa», «Vechernyı Stepnogorsk», «Stepnogor aqshamy» gazetteriniń, qalalyq telearnanyń tilshileri qatysty.
Jıynǵa qatysýshylarǵa 2009 jáne 2010 jyldary qalanyń kóshe joldaryn jóndeýge «Jol kartasy» is-sharasy aıasynda jyl saıyn 50 mln. teńgeden bólingendigi aıtyldy. Ótken jyly oblystyq bıýdjetten jobalyq-smetalyq quttama ázirleýge 8 mln. teńge bólindi.
Qazirgi tańda Stepnogor qalasynyń joldaryn jóndeý monoqalalardy damytý respýblıkalyq baǵdarlamasy aıasynda júrgizilýde. Aǵymdaǵy jyly atalǵan baǵdarlama aıasynda kóshe joldaryn jóndeýge 253 mln. teńge bólindi. Sonymen qatar osy maqsattarǵa oblys bıýdjetinen 125 mln. teńge baǵyttalyp otyr. Al qala bıýdjetinen kóshe joldaryn aǵymdyq jóndeý jumystaryna 55 mln. teńge beriledi.
QR Kólik jáne kommýnıkatsııa mınıstrligine Stepnogor qalasynyń kóshe joldary jelisin kúrdeli jóndeý úshin respýblıkalyq bıýdjetten 2,9 mlrd. teńgeden astam qarjy bólýge usynys jasaldy.
Kezdesý qorytyndysy boıynsha bıilk organdarynyń jumysyna qoǵamdyq baqylaý júrgizý úshin áýesqoı avtomobılshilerdiń bastamashyl tobyn qurý týraly sheshim qabyldandy.
